काठमाडौं । प्रधानमन्त्री पुष्पकमल दाहालले सत्ता गठबन्धनको प्रमुख दल नेपाली कांग्रेसका सभापति शेरबहादुर देउवासँग मन्त्री हेरफेर र संसद्मा दिने जवाफका विषयमा छलफल गर्ने भएको छ । प्रमुख प्रतिपक्षी दल नेकपा एमालेले विवादित तीन मन्त्रीको राजीनामा मागसहित सरकारको जवाफ माग गरिरहेको छ ।
सभामुख देवराज घिमिरेले सरकारलाई संसद्मा उठेका प्रश्नको जवाफ भोलिको बैठक दिन यसअघि नै निर्देशन दिइसकेका छन् । त्यही कारण प्रधानमन्त्री दाहालले आज कांग्रेस सभापति देउवासँग छलफल गर्न लागेका हुन् । देउवासँग मन्त्रिपरिषद्का केही सदस्यको मात्र हेरफेर गर्ने कि पुरै सेट नै भन्नेबारे छलफल गर्ने तयारी प्रधानमन्त्रीको छ ।
प्रधानमन्त्री दाहालले देउवाका अडानका कारण अर्थ, उद्योग र एकीकृत समाजवादी अध्यक्ष माधवकुमार नेपालको अडानका कारण भौतिक पूर्वाधार मन्त्री प्रकाश ज्वालालाई हटाउन सकेका छैनन् । त्यसैगरी टेरामक्स खरिद प्रकरणमा अख्तियार दुरुपयोग अनुसन्धान आयोगको छानबिनमा परेका स्वास्थ्य मन्त्री मोहनबहादुर बस्नेत र लुम्बिनीको जग्ग्गा भाडामा दिने विवादास्पद निर्णय गरेका संस्कृति, पर्यटन तथा नागरिक उड्डयन मन्त्री सुदन किरातीलाई पनि परिवर्तन गर्ने तयारी दाहालले गरेका छन् ।
नेपाली कांग्रेसका सभापति देउवाले अहिले मन्त्रिपरिषद्का सदस्य परिवर्तन गर्न चाहेका छैनन् । उनले दुई वर्षका लागि मन्त्री बनाएकाले हटाइहाल्दा पार्टीभित्र नकारात्मक सन्देश जाने मात्र नभएर त्यसपछि मन्त्री बनाउँदा पनि विरोधको सामना गर्नुपर्ने जोखिम देखेका छन् । तर प्रधानमन्त्री दाहाल दुई महिनायता नै केही मन्त्री हटाउन खोजिरहेका छन् ।
प्रधानमन्त्री दाहालले आज देउवासँग छलफलपछि नेकपा एकीकृत समाजवादीका अध्यक्ष माधवकुमार नेपालसँग पनि परामर्श गर्ने तयारी गरेका छन् । देउवा र नेपालसँग एक्लाएक्लै परामर्शपछि साँझसम्म गठबन्धन दलका शीर्ष नेताहरुको बैठक बोलाउने तयारी प्रधानमन्त्रीको छ । संसद्मा विपक्षीले उठाएका प्रश्नको जवाफ दिन पनि उनले आज दिनभर छलफल गरेर एउटा निर्णयमा पुग्ने दाबी स्रोतको छ ।
