काठमाडौं । प्रतिनिधिसभाको बैठक आज बस्दै छ । बिहान ११ बजेका लागि बैठक बोलाइएको हो ।
बैठकमा सभामुख देवराज घिमिरेले प्रतिनिधिसभा कार्यव्यवस्था परामर्श समितिमा सदस्यहरुको नाम हेरफेर गर्ने कार्यसूची छ । त्यस्तै आजको बैठकमा परराष्ट्रमन्त्री एनपी साउदले विमस्टेक बडापत्र प्रस्तुत् गर्नेछन् ।
संघीय मामिला तथा सामान्य प्रशासन मन्त्री निता देवीले निर्माणमुखी सामग्री (व्यवस्थापन तथा नियमन) विधेयक, २०८० प्रस्तुत गर्न अनुमति माग्ने प्रस्ताव प्रस्तुत् गर्ने कार्यसूची पनि छ । बैठकमा अर्थमन्त्री प्रकाशशरण महतले ’भन्सार विधेयक, २०८० माथि विचार गरियोस्’ भनी प्रस्ताव प्रस्तुत गर्नेछन् ।
प्रधानमन्त्री पुष्पकमल दाहालले राज्य व्यवस्था समितिको प्रतिवेदनसहितको ’राष्ट्रिय सभामा उत्पत्ति भएको अनुगमन तथा मूल्याङ्कन विधेयक, २०७८ माथि छलफल गरियोस्’ भनी प्रस्ताव प्रस्तुत गर्नेछन् ।
यसअघि बसेको बैठकमा सभामुख देवराज घिमिरेले विपक्षीले उठाएका प्रश्नको जवाफ १८ गतेको बैठकमा दिन निर्देशन दिएका थिए । तर संसद्को आजको कार्यसूचीमा प्रधानमन्त्रीले जवाफ दिने कुनै कार्यक्रम छैन ।
