काठमाडौं । नेपाल नागरिक उड्डयन प्राधिकरणले सुनसरीको धरानमा विमानस्थल नबनाउने निर्णय गरेको छ ।
संस्कृति, पर्यटन तथा नागरिक उड्डयन मन्त्री सुदन किराती र धरान उपमहानगरपालिकाका प्रमुख हर्क साम्पाङ राईको योजनाविपरित प्राधिकरणले विमानस्थल नबनाउने निर्णय गरेको हो ।
प्राधिकरणले धरानको विमानस्थल हवाई नीतिविपरित भएको र आर्थिकरुपमा फाइदा नहुने कारण देखाएर नबनाउने निर्णय गरेको हो । प्राधिरकणले गठन गरेको कार्यदलले बुझाएको प्रतिवेदनमा पनि भौगोलिक, प्राविधिक र नीतिगत रुपमा धरानमा विमानस्थल निर्माण सम्भव नहुने निष्कर्ष निकालेको थियो ।
हवाई नीतिअनुसार तराईमा ४० र पहाडि क्षेत्रमा २० नटिकल माइलभित्र विमानस्थल बनाउन पाइँदैन । धरान र विराटनगरबीचको हवाई दुरी १९ नटिकल माइल मात्र छ । विराटनगरमा विमानस्थल सञ्चालनमा रहेकाले नीतिअनुसार धरानमा विमानस्थल बनाउन नपाइने भएको हो ।
