काठमाडौं । सत्तारूढ दल नेकपा माओवादी केन्द्रमा गठबन्धनको विकल्पसम्मका विषयमा छलफल हुन थालेको छ । नेपाली कांग्रेसले महासमिति बैठकमार्फत आगामी निर्वाचनमा गठबन्धन नगर्ने निर्णय लिएपछि झस्किएको माओवादी केन्द्र अब अहिलेदेखि नै विकल्प खोज्नुपर्ने बहसमा छ । माओवादी केन्द्रको स्थायी समितिको बैठकमा गठबन्धनको विकल्पबारे पनि छलफल सुरु भएको हो ।
माओवादी केन्द्रको स्थायी समितिको बैठक आज पनि बस्दैछ । आजको बैठकले गठबन्धनको विकल्प नै खोज्ने निर्णय त गर्ने छैन तर छलफलचाहिँ चर्को हुने देखिएको छ । हिजोको बैठकमा पनि अधिकांश सदस्यहरुले राष्ट्रिय सभाको अध्यक्ष कुनै पनि हालतमा छाड्न नहुने तर्क गरेका छन् ।
माओवादी केन्द्रका वक्ता अग्निप्रसाद सापकोटाले राष्ट्रिय सभाको अध्यक्ष छाड्न हुन्न भन्नेमा पार्टीभित्र एकमत रहेको बताए । उनले कांग्रेसको महासमितिमा भएको छलफल र पारित भएको प्रस्तावका विषयमा पनि सामान्य छलफल भएको जानकारी दिएका छन् । उनको यो भनाइले अब माओवादी केन्द्र गठबन्धनभित्र अलि कडा रुपमा आउँछ भन्ने आँकलन गर्न सकिन्छ ।
कांग्रेसको महासमिति बैठकमा उठेका मुख्य तीन वटा विशेषबाट माओवादी केन्द्र झस्किएको हो । महामन्त्री गगन थापाले पेस गरेको प्रतिवेदनमा आगामी चुनावअघि गठबन्धन नगर्ने उल्लेख थियो ।
यसैगरी एक हजार एक सय ३१ जना महासमिति सदस्यले कांग्रेस हिन्दू राष्ट्रको पक्षमा उभिनुपर्ने लिखित सुझाव नै दिएका थिए । कांग्रेस उपसभापति एवं रक्षामन्त्री पूर्णबहादुर खड्काको प्रतिवेदनमा माओवादी युद्धका कारण देश पछि परेको निष्कर्ष निकालिएको थियो । यस्तो विषय कांग्रेसमा बलियो हुन थालेपछि माओवादी केन्द्र सशंकित देखिएको हो ।
