काठमाडौँ । इंग्लिस प्रिमियर लिग फुटबल अन्तर्गत वेस्टहाम युनाइटेड विजयी भएको छ । गएराति भएको खेलमा वेस्टहामले ब्रेन्टफोर्डमाथि ४–२ गोलको जित निकालेको हो ।
घरेलु मैदानमा वेस्टहामलाई जित दिलाउन जारोर्ड बोइनले ह्याट्रिक गरे । यस्तै, इमर्सन पालमीरीले एक गोल थपे ।
खेलको पाँचौं र सातौं मिनेटमा बोइनले गोल गर्दै वेस्टहामलाई दुई गोलले अघि बढाएका थिए । १३ औं मिनेटमा निल माउपेले गोल गर्दै ब्रेन्टफोर्डलाई १–२ मा ल्यााए । ६३ औं मिनेटमा बोइनले गोल गर्दै ह्याट्रिक पूरा गरे ।
६९ औं मिनेटमा इमर्सनले गोल गर्दा वेस्टहाम ४–१ ले अघि बढ्यो । ८२ औं मिनेटमा योने वीसाले गोल गरेपनि ब्रेन्टफोर्डको हार टार्न सकेनन् र टोली २–४ गोलले पराजित भयो ।
वेस्टहाम २६ खेलबाट ३९ अंकका साथ तालिकाको आठौं स्थानमा छ । ब्रेन्टफोर्ड २५ अंकका साथ १६ औं स्थानमा छ ।
