कैलाली । नेकपा एमाले कैलालीको अध्यक्षमा यज्ञराज ढंगाना निर्वाचित भएका छन् । उनले वर्तमान कार्यसमितिका कार्यवाहक अध्यक्ष दुर्गाप्रसाद जोशी र सचिव डेजी पाण्डेलाई हराएका हुन् ।
अध्यक्षमा निर्वाचित ढुंगानाले २ सय ८७, पाण्डेले २ सय १८ र जोशीले ६३ मत प्राप्त गरे । कार्यसमितिमा भने मिश्रित परिणाम आएको छ ।
उपाध्यक्षमा डेजी पाण्डे प्यानलका लोकेन्द्रबहादुर शाही १ सय ९३ मत प्राप्त गरी विजयी भएका छन् । उनका प्रतिद्वन्द्वी दलबहादुर बिष्टले पाँत मत कम अर्थात १ सय ८८ मत पाए । उपाध्यक्षका उम्मेदवार विष्णु चौधरीले १ सय ६ मत, मदनराज ओझाले ३३ मत र गजेन्द्र स्वारले २७ मत ल्याए ।
यसैगरी सचिवमा पनि पाण्डे प्यानलका ममताप्रसाद चौधरी विजयी भएका छन् । चौधरी २ सय ४३ मतसहित विजयी हुँदा उनका प्रतिद्वन्द्वी ढुंगाना प्यानलका विष्णुकुमार चन्दले १ सय ६८ मत पाए । सचिवकै अर्का उम्मेदवार दानबहादुर विश्वकर्माले १ सय ४७ मत प्राप्त गरे । विश्वकर्मा दुर्गा प्रसाद जोशी प्यानलबाट चुनाव लडेका थिए ।
यस्तै उपसचिव (खुला) मा भने ढुंगाना प्यानलका चुडामणी भट्ट २ सय ५१ मत पाएर विजयी हुँदा उनका प्रतिद्वन्द्वी भुवन रिजालले १ सय २३ मत पाए । यस्तै अर्का उम्मेदवार नृप थ्यायत खड्काले ९५ र राजु गुरूङले ७१ मत पाएका छन् ।
उपसचिव (महिला) मा गंगाकुमारी चौधरी १ सय ९६ मतसहित विजयी भएकी छन् । उनकी प्रतिद्वन्द्वी शान्तिदेवी सिंहले एक सय ६१, रत्ना कुँवर जोशीले ९४ र अम्बिका विष्टले ९० मत पाए ।
