काठमाडौं । नेकपा एमालेको केन्द्रीय कमिटीको बैठकले पार्टीको कार्यशैली सुधारदेखि जनसरोकारका विषयमा आज विभिन्न निर्णय गर्दै छ ।
तीन दिनदेखि जारी केन्द्रीय कमिटीको बैठकले विभिन्न सुझाव समेटेर पार्टीले आगामी दिनमा लिने रणनीतिबारे निर्णय लिने छ ।
बैठकमा पार्टी शुद्धीकरण र सुदृढीकरण, जनआधारित कार्यकर्ता पार्टीको मर्मलाई बुझ्ने र कार्यान्वयन गर्ने चुनौती, संगठन र जनपरिचालन सम्बन्धीलगायत प्रस्तावमा नौ समूहभित्र छलफल भएको थियो । यी प्रस्तावमा आएका धारणा समेटेर निर्णय लिइने छ ।
छलफलका क्रममा केन्द्रीय सदस्यहरुले पार्टी सुदृढीकरणका लागि नेता तथा कार्यकर्ताको जीवनशैली सुधार हुनुपर्ने, गुटबन्दी अन्त्य हुनुपर्ने, सदस्यता वितरणमा निश्चित योग्यता हेर्नुपर्नेलगायतका सुझाव दिएका छन् । यसैगरी केन्द्रीय सदस्यहरुले सरकारको चर्को आलोचना गरेका छन् । सरकारले महँगी र बेरोजगारी बढाएको आरोप उनीहरुको छ । केन्द्रीय सदस्यहरुले युवाको विदेश पलायनलगायतमा मुद्दासमेत उठान गरेर जनपरिचलान गर्नुपर्ने सुझाव दिएका छन् ।
समाजमा बढ्दो निरासा र सामाजिक अराजकतालगायत जनसरोकारका विषयलाई एमालेले सम्बोधन गर्न पहल गर्नुपर्ने सुझाव नेतारुले दिएका छन् । आजको बैठकमा समूहका टोली नेताहरुले सुझावको साथ प्रस्तुत गर्नेछन् ।
