काठमाडौं । प्रतिनिधिसभा सदस्य लालबाबु पण्डितले कांग्रेसको नेतृत्वमा सरकार बनाएमा जनमतको अपमान हुने बताएका छन् । बिहीवार सामाजिक सञ्जाल फेसबूकमा सन्देश लेख्दै पूर्वमन्त्री समेत रहेका पण्डितले नेकपा एकताको सम्भावना समाप्त भइनसकेकाले कांग्रेसको नेतृत्वमा सरकार बनाए जनमतको अपमान हुने बताएका हुन् ।
‘नेकपामा कठिन भए पनि एकताको सम्भावना समाप्त भएको छैन । बहुमत प्राप्त पार्टीले नेपाली कांग्रेसको नेतृत्वमा सरकार बनाउन जान हुँदैन । यो जनमतको अपमान हुने भएकाले कही यस्तो अवस्था नआओस् । मेरो यसमा विरोध रहने छ । नेतृत्वलाई बेलैमा जानकारी गराउँछु,’ पण्डितले फेसबूकमा लेखेका छन् । पण्डित पार्टी विभाजनअघि नेकपामा माधव नेपाल निकट मानिन्थे ।
प्रतिनिधिसभा पुनःस्थापना भएको भोलिपल्ट पुष्पकमल दाहाल ‘प्रचण्ड’ र माधव नेपालले कांग्रेस सभापति शेरबहादुर देउवासँग सहकार्य गरेर अगाडि बढ्न प्रस्ताव गरेका थिए ।
