काठमाडौं । नेपाल कम्युनिष्ट पार्टी आफ्नो रहेको भन्दै ऋषि कट्टेलले दिएको रिटमा आज सुनुवाइ भइरहेको छ। तत्कालीन एमाले र माओवादी मिलेर बनेको दललाई त्यो नाम दिन नपाइने भन्दै कट्टेलले रिट जाहेर गरेका हुन् ।
आयोगले कट्टेलको पार्टीसँग नाम मिले पनि कोष्टभित्र नेकपा लेख्ने गरी नयाँ दललाई मान्यता दिएको थियो। कट्टेलले नेकपालाई संविधान र निर्वाचन ऐनविपरीत आफ्नो दलसँग नाम मिल्ने गरी दर्ता गराएको भन्दै पहिले आयोगमा निवेदन दिएका थिए।
आयोगले उनको निवेदनमाथि निर्णय गर्दा पनि नयाँ दलको नाम पनि कोष्टमा नेकपा लेखेर मान्यता दिएपछि कट्टेलले २०७५ साल मंसिरमा रिट दिएका थिए।
न्यायाधीश वमकुमार श्रेष्ठ र कुमार रेग्मीको इजलासमा उक्त मुद्दाको पेशी परेको छ। यसअघि यो मुद्दामा १० पटक पेशी तोकिएको थियो।
पहिलोपटक कारण देखाऊ आदेश भएपछि संयुक्त इजलासमा पुगेको यो रिटको सुनुवाइ २ पटक कट्टेल पक्षले, २ पटक विपक्षी, १ पटक महान्यायाधीवक्ता कार्यालयले स्थगित गरेका छन्।
कट्टेल अध्यक्ष रहेको नेपाल कम्युनिष्ट पार्टी गत मंसिर १० र २१ गते भएको निर्वाचनमा ‘घन र कोदालो’ चिन्ह लिएर सहभागी भएको थियो।
नेपाल कम्युनिष्ट पार्टी २०४८ साल अघि देखि नै आयोगमा दर्ता छ।
राजनीतिक दलसम्बन्धी ऐनको दफा ६ को १(ङ) मा दलको नाम वा चिन्ह आयोगमा दर्ता कायम रहेको दलको नाम वा चिन्हसँग मिल्ने भएमा दर्ता हुन नसक्ने उल्लेख छ।
