काठमाडौं । प्रतिनिधि सभाका सांसदहरूले एकमुष्ट तीन महिनाको तलव पाउने भएका छन् । सर्वोच्च अदालतले प्रतिनिधि सभा विघटन बदर गरिदिएपछि उनीहरूले संसद नचलेको अवधिको पनि तलब पाउने भएका हुन्।
प्रधानमन्त्रीको सिफारिसमा राष्ट्रपतिले पुस ५ गते प्रतिनिधिसभा भंग भएसँगै २७५ जनासांसदहरुको तलब सुविधा रोकिएको थियो । संसद सचिवालयका प्रवक्ता रोजनाथ पाण्डेले पुसको बाँकी अवधिको र माघ तथा फागुनको तलब सांसदहरूको खातामा जम्मा हुने बताए।
सांसदहरूको तलब मासिक ६५ हजार रूपैयाँ वुझ्ने गरेका छन् । यो हिसावले मासिक एक करोड ८० लाख रूपैयाँ प्रतिनिधिसभाका सांसदको एक महिनाको तलबभत्तामा खर्च हुन्छ ।
पुस र माघ महिनाको ३ करोड ५७ लाख ५० हजार रूपैयाँ र फागुन महिनाको १ करोड ७८ लाख ७५ हजार रूपैयाँ गरी ५ करोड ३६ लाख २५ हजार रूपैयाँ सांसदले तलबमात्र पाउने भएका हुन् ।
प्रमुख प्रतिपक्षी दलका नेता, समितिका सभापति र दलका सचेतकलगायतको केही बढी छ। यो अवधिमा बैठक बसेको भए उनीहरूले बैठक भत्ता र यातायात सुविधा पाउने थिए।
राष्ट्रिय सभाका सांसदहरुले भने नियमित तलब पाउँदै आएका छन्।
