काठमाडौँ । आईसीसी पुरुष क्रिकेट विश्वकप लिग–२ को त्रिकोणात्मक शृङ्खलाको दोस्रो खेलमा आज शनिबार नेपालले नेदरल्यान्ड्ससँग प्रतिस्पर्धा गर्दैछ ।
नेपाल र नेदरल्यान्ड्सबीचको खेल बिहान सवा नौ बजे कीर्तिपुरस्थित त्रिवि मैदानमा सुरु हुनेछ । यसअघिको पहिलो खेलमा नामिबियासँग चार विकेटले हार ब्यहोरेको नेपाल जित निकाल्ने लक्ष्यका साथ मैदानमा उत्रनेछ ।
तर, नेदरल्यान्ड्सलाई हराउन नेपाललाई सजिलो भने हुनेछैन । गत वर्ष भारतमा भएको एकदिवसीय विश्वकप खेलेर सबैलाई चकित तुल्याएको नेदरल्यान्ड्सले उक्त विश्वकपमा दक्षिण अफ्रिकालाई ३८ रनले तथा बंगलादेशलाई ८७ रनले पराजित गरेको थियो ।
नेदरल्यान्ड्सको भने पहिलो खेल हुनेछ । नेपाली दर्शकले भरिपूर्ण मैदानमा जित निकाल्दै नेदरल्यान्ड्स लिग २ को सुखद् सुरुवात गर्न चाहन्छ ।
लिगमा २४ त्रिदेशीय शृङ्खलाअन्तर्गत पहिलो शृङ्खला नेपालमा हुन लागेको हो । आगामी सन् २०२७ सम्म चल्ने उक्त लिग–२ मा नेपालसहित आठ टोलीको सहभागिता हुनेछ । पहिलो सिरिजमा नेपाल, नामिबिया र नेदरल्यान्यड्सबीच प्रतिस्पर्धा हुँदैछ ।
गत संस्करणमा सात टिमबीच प्रतिस्पर्धा भएकामा यसपटकको लिग–२ मा भने आठ टोली भिड्दैछन् । आठ टिमले कुल १४४ एकदिवसीय खेल खेल्नेछन् भने २४ त्रिकोणात्मक सिरिजमा प्रतिस्पर्धा हुनेछ ।
आठमध्ये शीर्ष चारमा पर्ने टिमको एकदिवसीय मान्यता स्वतः कायम रहन्छ भने विश्वकप छनोटमा सिधा स्थान बनाउनेछन् । यसअघि शीर्ष तीन टोली विश्वकपमा सिधै छनोट भएका थिए ।
बाँकी चार टिमका लागि दोस्रो अवसर हुनेछ । चार टिमले विश्वकप क्वालिफायर प्लेअफ खेल्नेछन्, जहाँ विश्वकप च्यालेन्ज लिगबाट आउने चार टिम गरी आठ टिमबीच प्रतिस्पर्धा हुनेछ ।
