काठमाडौं । श्री जनता वनवालि उच्च मा.वि. बर्छवामा एक दिने निःशुल्क स्वास्थ्य शिविर सञ्‍चालन भएको छ । नागरिक सैनिक सम्बन्ध अभिवृद्धि गर्ने उद्देश्यले श्री शेर गण र श्री नं. २७ फिल्ड एम्बुलेन्स गुल्म तथा नरहा गाँउपालिकाको सहकार्यमा मिति २०७७।११।१५ गते सिराहा जिल्ला नरहा गाँउपालिकाका देवीपुर र बर्छवाका ५ वटै वडाका स्थानीय बासिन्दाहरुलाई लक्षित गरी शिविर सञ्‍चालन गरिएको हो ।

उक्त एक दिने निःशुल्क स्वास्थ्य शिविर कार्यक्रममा श्री जिल्ला अस्पताल सिराहा, श्री जानकी मेडिकल कलेज धनुषा, श्री सगरमाथा आँखा अस्पताल र श्री नं.२७ फिल्ड एम्बुलेन्स गुल्म सहित जम्मा १६ जना स्वास्थ्यकर्मीहरुले सेवा उपलब्ध गराउनु भएको थियो । बिरामीहरुलाई  नि:शुल्क औषधी वितरण तथा स्वास्थ्य सेवा उपलब्ध गराइएको सो स्वास्थ्य शिविरबाट महिला- ५८२ र पुरुष- ३७९ जना गरि जम्मा ९६१ जना सर्वसाधारणहरु लाभान्वित भएका छन् । 

कार्यक्रममा स्वास्थ्य शिविरका साथै नेपाली सेना सम्बन्धी Join the Nepali Army, MIne Risk Education र विपद व्यबस्थापन सम्बन्धी जनचेतनामूलक प्रस्तुतिकरण समेत गरिएको थियो । सेना र आम नागरिक बीचको सम्बन्धलाई अझ प्रगाढ बनाउन यस किसिमको स्वास्थ्य उपचार सेवाले सकारात्मक भूमिका खेल्ने नेपाली सेनाले विश्वास लिएको छ ।