काठमाडौँ । ओडिआई सिरिजअन्तर्गतको पहिलो खेलमा क्यानडाविरुद्ध नेपाल दबाबमा परेको छ । नेपालले दिएको दुई सय २५ रनको लक्ष्य पछ्याएको क्यानडाले २७ ओभरमा तीन विकेट गुमाएर एक सय ५० रन बनाएको छ ।
क्यानडाका निकोलस किर्तन अविजित ४१ र हर्ष ठाकेर २० रन बनाउँदै क्रिजमा सँघर्षरत छन् । क्यानडालाई जितका लागि अब २३ ओभरमा ७३ रन आवश्यक छ ।
क्यानडाले २.५ ओभरमै आफ्नो पहिलो विकेट गुमाएको थियो । एकदिवसीय अन्तर्राष्ट्रिय प्रतियोगिताको आफ्नो ‘डेब्यू’ खेलमै रिजन ढकालले लिएका थिए । उनले क्यानडाका ओपनर ब्याट्सम्यान नवनित धालिबललाई ६ रनमा आउट गराएका थिए ।
नेपालका तिब्र गतिका बलर सोमपाल कामीले क्यानडाको दोस्रो विकेट झारेका थिए । ओपनर एरोन जोन्सन पाँचौ ओभरको अन्तिम बलमा २० रन बटुल्दै आउट भएका थिए ।
क्यानडाको तेस्रो विकेट कप्तान रोहित पौडेलले लिएका थिए । रोहितले ब्याट्सम्यान परगत सिंहलाई ५० रनमा पेभेलियन फर्काएका थिए । परगत सिंहले ५८ बलमा नौ चौका हिर्काएका थिए । १९.४ ओभरमा उनी आउट हुँदा क्यानडाले एक सय १४ रन बनाएको थियो ।
