काठमाडौंः क्रान्तिको कार्यभार पूरा नभएको भन्दै भूमिगत शसस्त्र आन्दोलन गरिरहेको नेपाल कम्युनिष्ट पार्टीका महासचिव नेत्र विक्रम चन्द (बिप्लब) ले आफूहरु खुला रुपमा मुक्त आकाशको खोजीमा सार्वजनिक भएको बताउनु भएको छ ।
नेकपा र नेपाल सरकारबीच तीन बुँदे सहमतिमा हस्ताक्षर गर्न राष्ट्रिय सभागृहमा शुक्रबार आयोजित कार्यक्रममा महासचिव बिप्लबले सरकार र आफ्नो पार्टीबीच भएको तीन बुँदे सहमतिलाई दृढतापूर्वक पालना गर्दै त्यसमा प्रतिबद्ध रहेको बताउनुभयो ।
केही वर्षदेखि भूमिगत रहनु भएका बिप्लबले पहिलो पटक सार्वजनिक हुँदै सरकारसँग भएको तीन बुँदे सहमतिका बारेमा शंका र कुतर्क नगर्न आग्रह गर्नु भयो । उहाँले भन्नुभयो, त्यो हाम्रो विश्वास हो, हामी त्यसप्रति प्रतिबद्ध छौं ।
उहाँले अगाडि भन्नुभयो– जुन र घामको पनि भेट हुन्छ, हामीले यसअघि पनि सरकारका जिम्मेवार व्यक्तिहरुसँग भेटेका छौं । प्रधानमन्त्रीसँग पनि विगतमा कुरा भएका छन् । छलफल भएका थिए ।
नेपाली समाजको रुपान्तरण हुँदै आएको छ, तर त्यो पूर्ण भएको छैन भन्दै बिप्लबले आज पनि किसानको स्थिति बेहाल छ, दलित, महिला, उत्पीडित समुदाय पीडामा रहेका छन् भन्नुभयाे ।
उहाँले दलाल पूँजीवादी व्यवस्थाले देशको विकास सम्भव छैन भन्ने आफ्नो र पार्टीको दृष्टिकोण यथावत रहेको बताउँदै तर अहिलेकै परिस्थितिमा पनि हामी सहकार्य गर्न, हातेमालो गरेर अघि बढ्न तयार छौं भन्नुभयो ।
महासचिव बिप्लबले भन्नुभयो– यो अहिले जुन अवसर प्राप्त भएको छ, त्यसलाई पालना गर्न नेपाल सरकारलाई आश्वस्त पार्न चाहन्छु ।
उहाँले अहिलेको स्थितिमा ल्याउन नेपाल सरकार, कानुनविद, बुद्धिजीवी, पत्रकार, विभिन्न क्षेत्रका व्यक्ति, कमरेडहरु समेतका सबैलाई सम्मान र धन्यवाद दिनुभयो ।
“यो सहमति केबल सरकार र नेकपाबीचको मात्र होइन, यो सहमतिको पछाडि महान आकाँक्षा छ । देशलाई स्वाधीन, सम्पन्न र आत्मनिर्भर बनाउने योजना छ । नेपाली युवाको चाहना र आकाँक्षालाई सम्बोधन गर्नुपर्ने छ ।” उहाँले भन्नुभयो ।
करिब १५ मिनेट सम्बोधन गर्नु भएका महासचिव बिप्लबले विगतमा पार्टीले गरेका शहादत र हत्याहिंसाका पीडितको पक्षमा भने केही उल्लेख गर्नु भएन ।
