काठमाडौँ । सरकारले अघि बढाएको मिडिया काउन्सिल तथा आमसञ्चार विधेयकबारे प्रेस काउन्सिल नेपालले चासो देखाएको छ ।
बिहीवार काठमाडौंमा सरोकारवालाहरुसँग प्रेस काउन्सिल नेपालले मिडिया काउन्सिल तथा आमसञ्चार विधेयकको सम्बन्धमा छलफल गरेको हो ।
नेपाली मिडियाको विकास तथा संवद्र्धन गर्दै नियमन गर्ने भनि अघि बढाएको मिडिया काउन्सिल लगायतका विधेयकको सम्बन्धमा सरोकारवालाहरुले मिश्रित प्रतिक्रिया दिएका छन् । सरकारले मिडिया काउन्सिल विधेयक, आमसञ्चार सम्बन्धी विधेयक परिमार्जन नगरी अगाडी बढाउनु नहुने विज्ञहरुले सुझाव दिँदै आएका छन् । मिडिया काउन्सिल सम्बन्धि विधेयकले प्रेस काउन्सिल नेपालको संरचनालाई प्रभाव पार्ने भन्दै यसको बिरोध हुँदै पनि हुँदै आएको छ ।
यसै सन्दर्भमा न्युज एजेन्सी नेपालसँग कुराकानी गर्दै प्रेस काउन्सिल नेपालका अध्यक्ष बालकृष्ण बस्नेतले सरकारले ल्याउने सञ्चार संवद्ध विधेयकहरु मिडिया प्रवद्र्धन, सञ्चारको विकास र पत्रकारहरुको हक, हितका लागि हुनुपर्ने भन्दै आफुहरुले छलफल चलाइरहेको बताउनु भयो । उहाँले त्यस्ता विधेयकहरु मिडिया र मिडियाकर्मीको विकास र संवद्र्धनप्रति केन्द्रित हुनुपर्नेमा जोड दिनुभयो । आगामी दिनमा बन्ने कानूनले मिडियामाथि आइलागेका संकटलाई सम्बोधन गर्नुपर्ने उहाँले बताउनु भयो ।
उहाँले भन्नुभयो – ‘प्रेस काउन्सिलले सञ्चार क्षेत्रको विकास, संवद्र्धन, प्रवद्र्धनका लागि सरकारले जुन खालका विधेयकहरुमा आफ्नो खालको तयारी गरेको छ । र केही विधेयकहरु संसदमा जाँदैछन् । संसदमा जाने विधेयकहरु साँच्चिकै मिडिया प्रवद्र्धनका लागि, सञ्चारका विकासका लागि, पत्रकारको हक, हितका लागि हुनुपर्छ भन्ने सन्दर्भमा हामीले पनि छलफल चलाइरहेका छौँ । हामीले सरकारलाई सुझाव पनि दिन्छौँ । यति मात्रै हो कि आएका सञ्चार संवद्ध विधेयकहरु विवादमा नपरुन्, विवादास्पद नहुन्, तिनले जनताको हित गरोस्, मिडिया र मिडियाकर्मीको विकास र संवद्र्धनप्रति ति विधेयकहरु केन्द्रित हुन् भन्नेमा हाम्रो चासो, चिन्ता र सरोकार छ ।
सरकारलाई पनि त्यही सुझाव दिनका लागि हामीले विभिन्न सुझाव संकलन गर्ने कार्यक्रमहरु पनि गरिरहेका छौँ । अहिले मिडियामाथि आइलागेका संकटलाई सम्बोधन गर्ने खालका आगामी कानूनहरुले त्यसलाई सम्बोधन गर्नुपर्छ भन्ने हाम्रो प्रमुख सरोकार हो । प्रेस काउन्सिल ऐनलाई, अथवा अहिलेको प्रेस काउन्सिललाई कसरी मजबुत बनाउन सकिन्छ, कसरी थप अधिकारसम्पन्न बनाउन सकिन्छ भन्ने सन्दर्भमा हाम्रो जहिलेपनि सरोकार हुन्छ । सरकारले पनि यो पक्ष त हेर्छ नै । चाहे त्यो कानून संशोधन गरेर होस् । चाहे काउन्सिललाई थप स्वायत्तता बनाउन कानूनी पूर्वाधार बनाएर होस् यो विषयमा हाम्रो सरोकार हुन्छ ।’
अध्यक्ष बस्नेतले प्रेस काउन्सिल ऐन अथवा प्रेस काउन्सिल नेपालाई मजबुत र अधिकारसम्पन्न बनाउनेगरी विधेयक आउनुपर्नेमा जोड दिनुभयो । सकारले प्रेस काउन्सिललाई बलियो बनाउन ध्यान दिनुपर्ने उहाँको भनाई छ
