काठमाडौं। अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले कुनै प्रकारको दोहोरो सुविधा नलिने घोषणा गर्नुभएको छ । आयोगका प्रमुख आयुक्तमा नियुक्त भइसकेपछि राईले सरकारी सेवा गरेवापत राज्यबाट पाउने निवृत्तिभरण (पेन्सन) सुविधा नलिने जानकारी गराउनु भएको हो ।
सामाजिक सुरक्षा कार्यक्रम कार्यविधि ०६९ ले सार्वजनिक लाभको पदमा बसेका व्यक्तिले दोहोरो सुविधा लिन नहुने व्यवस्था गरेको छ । राईले २०७७ साल फागुनदेखि आयोगबाट पारिश्रमिक र सेवा सुविधा पाउन थालेपछि सोही महिनादेखि नै सरकारबाट पाइरहेको पेन्सन सुविधा नलिने निर्णय गर्नुभएको हो ।
उहाँले यसको जानकारी निवृत्तिभरण व्यवस्थापन कार्यालय त्रिपुरेश्वरलाई समेत गराउनु भएको छ । प्रमुख आयुक्त राईको पत्रपछि निवृत्तिभरण व्यवस्थापन कार्यालयले पनि प्रमुख आयुक्त राईले खाइपाई आएको निवृत्तिभरण (पेन्सन) रकम रोक्का गरिएको जानकारी दिएको छ ।
