मुम्बई । इन्डियन प्रिमियर लिग (आइपीएल) २०२२ का लागि खेलाडीको लिलामी सूची सार्वजनिक भएको छ । यसपालि जम्मा ५९० खेलाडीको बिडिङ हुनेछ । यसपटकको आइपीएल लिलामी दुई दिनसम्म चल्नेछ । खेलाडीको लिलामी फेब्रुअरी १२ र १३ मा बैंगलोरमा हुनेछ । यो आईपीएलको १५ औँ सिजन हुनेछ र यस महत्वपूर्ण प्रतियोगितामा क्रिकेट जगत्का धेरै ठूला स्टारहरुले भाग लिनेछन् ।
यसपटक लिलामीमा दर्ता भएका ५९० खेलाडीमध्ये २२८ क्याप्ड र ३५५ अनक्याप्ड खेलाडी रहेका छन् । सात खेलाडी एसोसिएट देशका छन् ।
भारतका तर्फबाट श्रेयस अय्यर, शिखर धवन, आर.अश्विन, मोहम्मद शामी, इशान किशन, अजिङ्क्य रहाणे, सुरेश रैना, युजवेन्द्र चहल, वासिङ्टन सुन्दर, शार्दुल ठाकुर, दीपक चाहर, इशान्त शर्मा, उमेश यादव आदि यो लिलामीमा सहभागी हुनेछन् ।
यससँगै फाफ डु प्लेसिस, डेभिड वार्नर, प्याट कमिन्स, कागिसो रबाडा, ट्रेन्ट बोल्ट, क्विन्टन डी कक, जोनी बेयरस्टो, जेसन होल्डर, ड्वेन ब्राभो, शकिब अल हसन, वानिन्दु हसरंगा जस्ता क्रिकेट जगतका ठूला नामहरू पनि सहभागी हुनेछन्।
यसमा कुल १० फ्रेन्चाइजी टोलीहरू– चेन्नई सुपर किंग्स, दिल्ली क्यापिटल्स, मुम्बई इन्डियन्स, कोलकाता नाइट राइडर्स, पञ्जाब किंग्स, राजस्थान रोयल्स, रोयल च्यालेन्जर्स बैंगलोर, सनराइजर्स हैदरावाद, लखनउ सुपर जायन्ट्स र अहमदाबाद टोली सहभागी हुनेछन्।
कुल ४८ खेलाडीले दुई करोड भारुको उच्चतम रिजर्भ मूल्यको कोष्ठकमा आफूलाई राखेका छन्। बीस खेलाडी एक करोड ५० भारु कोष्ठमा छन्। ३४ खेलाडी १ करोड भारुको रिजर्भ मूल्यमा छन् ।
विदेशी खेलाडीमध्ये अष्ट्रेलियामा सबैभन्दा बढी ४७ जनाको नाम छ । वेस्ट इन्डिजका ३४ र दक्षिण अफ्रिकाका ३३ खेलाडी छन् । एसोसिएट देशमा नामिबियाका तीन, स्कटल्याण्डका दुई र नेपालका एक खेलाडी छन् ।
एक टोलीमा अधिकतम २५ खेलाडी हुन सक्छन् र विदेशी खेलाडीहरूको अधिकतम सङ्ख्या आठ हुन सक्छ। १० टोलीले ३३ खेलाडीलाई रिटेन वा ड्राफ्ट गरेका छन् अर्थात् लिलामीमा बढीमा २१७ खेलाडी बेच्न सकिनेछ ।
लिलामीअघि कोलकाताले दुई र पञ्जाबले एक विदेशी खेलाडी राखेका छन् भने अन्य सबै टोलीसँग १–१ खेलाडी छन् । लिलामीमा फ्रेन्चाइजीले बढीमा ७० विदेशी खेलाडी किन्न सक्नेछन् । पञ्जाब किंग्सको पर्समा सबैभन्दा बढी ७२ र दिल्लीको पर्समा सबैभन्दा कम ४७।५ करोड रुपैयाँ छ। फ्रान्चाइजीको कुल पर्स मूल्य ९० करोड रुपैयाँ छ।
सन्दीप लामिछानेको मूल्य भारु ४० लाख
यसैबीच नेपाली क्रिकेट टोलीका कप्तान सन्दीप लामिछानेले आइपीएलमा २०२२ को मेगा अक्सनमा आफ्नो न्यूनतम मूल्य ४० लाख भारु तोकेका छन् ।
आइपीएलको मेगा अक्सनमा सन्दीपलाई कुनै टोलीले मूल्य लगाएको खण्डमा कम्तीमा ४० लाख भारु पाउने निश्चित हुने छ ।
नेपालबाट सन्दीपसहित १५ खेलाडीले अक्सनमा नाम दर्ता गराएका थिए । आइपिएलको सर्ट लिष्टमा नेपालबाट सन्दीप मात्र मेगा अक्सनमा परेका हुन् ।
सन्दीपलाई सन् २०१८ मा तत्कालीन दिल्ली डेयर डेभिल्सले न्यूनतम मूल्य २० लाख भारुमा अनुबन्ध गरेको थियो । त्यस सिजनमा सन्दीपले अन्तिम तीन खेल खेल्दै पाँच विकेट लिएका थिए ।
सन् २०१९ मा ६ खेलमा सन्दीपले आठ विकेट लिएका थिए । सन् २०२० मा भने सन्दीपले मौका पाएनन् । सन् २०२१ मा भने सन्दीपले आफ्नो अक्सनमा मूल्य ४० लाख भारु राखे पनि कुनै पनि टोलीले मूल्य लगाएका थिएनन् ।
