काठमाडौं । सरकारलाई बहुमत आवश्यक पर्ने देखिएपछि सत्तारुढ दल नेकपा एमालेले अर्को प्रतिपक्ष दल जनता समाजवादी पार्टीसँग हात अघि बढाएको छ ।
सोमबार मात्र औपचारिक रुपमा विभाजन भएको नेकपाको अर्को घटक माओवादी केन्द्रले समर्थन फिर्ता लिने अवस्था भएपछि सत्ता सहकार्यका लागि एमाले र जसपाको संयुक्त कार्यदल बनेको छ ।
कार्यदलमा एमालेबाट उपमहासचिव तथा अर्थमन्त्री विष्णु पौडेल, संसदीय दलका उपनेता सुवास नेम्वाङ र प्रधानमन्त्रीका विदेश मामिला सल्लाहकार डा. राजन भट्टराई रहनु भएको छ भने जसपाबाट सर्वेन्द्रनाथ शुक्ल र लक्ष्मणलाल कर्ण रहनु भएको छ ।
हाल नेकपा एमालेसँग प्रतिनिधिसभामा १२१ सिट रहेको छ भने जसपाको ३४ सिट रहेकोमा २ जना निलम्बनमा रहेका छन् । बहुमतको सरकारका लागि १३८ सिट आवश्यक पर्नेछ । अर्थात नेकपा एमालेले सरकार टिकाइराख्न कम्तीमा अरू १७ सिट जुटाउनु पर्नेछ ।
