यतिखेर नेपालको राजनीतिक सरगर्मी ह्वात्तै बढेको छ । सर्वाेच्च अदालतले करिब तीन वर्ष अघि एकीकरण भएको नेकपालाई एकीकरण अघिको अवस्थामा पुर्याइदिएसँगै सत्ताको चलखेल पनि शुरु भएको हो ।
सो फैसलापछि नेकपा विसं २०७५ जेठ ३ गतेकै अवस्थामा पुगेको छ । जसका कारण अहिलेको सरकार अब नेकपा एमालेको मात्र बन्न पुगेको छ । एमाले मात्रको सरकार रहँँदा यो अल्पमतमा परेको छ । यो सरकार अब माओवदी केन्द्रको समर्थनमा रहेको नेकपा एमालेको सरकार बन्न पुगेको छ ।
एमालेका सांसद संख्या १२१ जना मात्र रहेका छन् भने यस सरकारलाई ५३ सिट संख्याको माओवादीको समर्थन रहेको छ । अब त्यो समर्थन पनि नरहने अवस्थाको बारेमा माओवादी केन्द्रले जानकारी गराएपछि सत्ता जोगाउन प्रधानमन्त्री केपी ओली र प्रधानमन्त्री ओलीलाई फाल्न माओवादी केन्द्रका अध्यक्ष प्रचण्ड लागि पर्नुभएको छ ।
यता नेपाली काँग्रेस भने अझै पनि कुन पक्षमा रहने भन्ने बारेमा केही खुलेको छैन । एमालेले जनता समाजवादी पार्टीसँग सत्ता गठबन्धनको प्रक्रिया नै थालेको छ ।
उता प्रचण्ड पनि ओली सरकारका विरुद्धमा खुलेरै लाग्नुभएको छ । नेपाली काँग्रेस र जसपासँग उहाँ पनि सम्पर्कमा हुनुहुन्छ र ती दलका नेता भेट्दै हिँड्नुभएको छ ।
तथापि, नेपाली काँग्रेस र माओवादी केन्द्र मात्रले सरकार बन्दैन । उनीहरुलाई अझै २० भन्दा बढी सांसद आवश्यक पर्छ । जसपाको ३४ सिट संख्या छ तर पनि उनीहरुमा पनि फुट आउने देखिएको छ ।
किनभने महन्थ ठाकुरले ओलीसँगको भेटघाटलाई बढाएका छन् भने अर्का नेता उपेन्द्र यादव र प्रचण्ड यसको विपक्षमा छन् । त्यसैले यो दल सरकारमा गए पनि एक भएर होइन कि फुटेर जाने स्पष्ट देखिएको छ ।
यसै मेसोमा मंगलबार साँझ पनि प्रचण्डले बुढानिलकण्ठ नै पुगेर काँग्रेसका सभापति शेरबहादुर देउवालाई भेट्नुभएको थियो । उहाँ देउवा निवास पुगेर करिब आधा घन्टा त्यहाँ बस्नुभएको थियो ।
तर उहाँले हिजो नै भेट गरेको अर्काे व्यक्तिका बारेमा भने केही खुलेको छैन । हिजो साँझ बूढानिलकण्ठमा देउवालाई भेटेर निस्कनुभएका अध्यक्ष प्रचण्ड महाराजगञ्ज,नारायणगोपाल चोकको नजिक रहेको साम्बाला होटलमा पुगेरै एक महत्वपूर्ण भेट गर्नुभएको समाचार स्रोतले बताएको छ ।
उहाँ साँझ सो होटलमा करिब ४० मिनेट बस्नुभएको थियो । प्रचण्डले डा बाबुराम भट्टराईलाई भेट्न टोखा पुग्नुभएको थियो र त्यस अघि उहाँले साम्बालामा एउटा भेट गर्नुभएको थियो ।
तर उहाँले सो होटलमा कसलाई भेट्नुभयो भन्ने षियमा भने अहिलेसम्म केही खुलेको छैन ।
