विराटनगर । बिहान ९ बजेदेखि सुरु भएको कोशी प्रदेश राष्ट्रियसभा निर्वाचनमा ४ जना स्थानीय तहका प्रतिनिधिले मतदान गर्न बाँकी रहेको छ ।
कोशीमा अहिलेसम्म प्रदेशसभाका सबै ९३ सांसदले मतदान गरिसकेका निर्वाचन अधिकृतको कार्यालयका सूचना अधिकारी तीर्थ भट्टराईले बताए । स्थानीय तहतर्फबाट भने ४ जनाले मतदान गर्न बाँकी रहेकोले ३ बजेसम्म पर्खिने उनले बताए ।
बाँकी चार मतदाता मध्ये धरानका मेयर हर्क साम्पाङ पनि रहेका छन् । उनी अहिले वडाको एक कार्यक्रममा सहभागी छन् । उपमेयर आइन्द्रविक्रम वेघाले भने मतदान गरिसकेका छन् ।
फागुन २० गतेबाट रिक्त हुन लागेका २० पदमध्ये १९ पदमा आज मतदान हुँदै छ । त्यसमध्ये कोशी प्रदेशमा अन्य १ जना र महिला १ जना गरी दुई सदस्यको लागि चार जना चुनावी मैदानमा छन् । जसमा सत्ता गठबन्धनबाट काँग्रेसका कृष्णप्रसाद सिटौला र माओवादीबाट चम्पा कार्की उम्मेदवार छन् भने एमाले–राप्रपा गठबन्धनबाट एमालेकी रुक्मिणी कोइराला र राप्रपाका उद्धव पौडेल उम्मेदवार छन् ।
कोशी प्रदेशमा प्रदेश र स्थानीय तहमा गरी एमालेको मतभार ४२४८, कांग्रेसको ३६८४, माओवादी केन्द्रको १२७८, राप्रपाको ३९४, नेकपा एकीकृत समाजवादीको ३४५, जसपाको १२९ र स्वतन्त्रको ५७ मतभार छ । कोशीमा राप्रपा र एमाले मिलेपछि मतभार ४६४२ छ भने सत्ता गठबन्धनसँग ५४३६ मतभार छ ।
