काठमाडौँ । भारतको अयोध्यामा राम मन्दिरको अभिषेक कार्यक्रमको सम्पूर्ण तयारी पूरा भएको छ । प्राणप्रतिष्ठाको मुख्य पूजा अभिजित मुहूर्तमा हुनेछ । रामललाको जीवन अभिषेकको समय काशीका विद्वान गणेशवर शास्त्री द्रविडले तय गरेका हुन् ।
अतिथि १०ः४५ बजेभित्र रामजन्मभूमि परिसरमा प्रवेश गर्नुपर्नेछ । श्री रामजन्मभूमि तीर्थ क्षेत्रले जारी गरेको प्रवेशपत्रबाट मात्रै प्रवेश गर्न सकिने बताएको छ । आगन्तुकहरूले निमन्त्रणा कार्डबाट मात्र प्रवेश गर्न सक्ने छैनन् । प्रवेश कार्डमा रहेको क्युआर कोड मिलेपछि मात्र परिसरमा प्रवेश गर्न सकिनेछ । ट्रस्टले प्रवेशको मस्यौदा सामाजिक सञ्जालमा पनि साझा गरेको छ ।
सम्पूर्ण रामनगरीलाई आध्यात्मिक रंगले सजाइएको छ । मन्दिर परिसरको सौन्दर्य हेर्न लायक छ । प्रधानमन्त्री नरेन्द्र मोदी, चर्चित क्रिकेटर, सेलिब्रेटी, उद्योगपति, सन्त र विभिन्न देशका प्रतिनिधिलाई उक्त कार्यक्रममा सहभागी हुन आमन्त्रण गरिएको छ । अहिले भारतलगायत विश्वको नजर प्राणप्रतिष्ठाको ऐतिहासिक घडीमा केन्द्रित भएको छ ।
दिउँसो १ बजेसम्म प्राणप्रतिष्ठाको सम्पूर्ण कार्यक्रम सम्पन्न हुने श्री रामजन्मभूमि तीर्थ क्षेत्र कोषका महासचिव चम्पत राईले जानकारी दिए । पूजाका सबै अनुष्ठान सकिएपछि प्रधानमन्त्री नरेन्द्र मोदी, उत्तर प्रदेशका मुख्यमन्त्री योगी आदित्यनाथ, संघ प्रमुख मोहन भागवतले सन्देश दिनेछन् । श्री रामजन्मभूमि तीर्थ क्षेत्र ट्रस्टका अध्यक्ष महन्त नृत्य गोपाल दासले आशीर्वाद दिनेछन् ।
प्रधानमन्त्री नरेन्द्र मोदी सोमबार चार घण्टा अयोध्यामा बस्नेछन् । १०ः४० मा अयोध्या एयरपोर्ट र ११ः१० मा रामजन्मभूमि पुग्नेछन् । प्राणप्रतिष्ठा समारोहमा सहभागी भई दिउँसो १ बजे सभालाई उनले सम्बोधन गर्नेछन् । २ः२५ मा कुबेरटिलाको दर्शन गरेर उनी दिल्ली फर्कनेछन् ।
अभिषेक सम्पन्न भएपछि रामज्योति प्रज्वलन गरी दीपावली मनाइनेछ । साँझ १० लाख दियोले अयोध्या उज्यालो हुनेछ । यससँगै घर, पसल, प्रतिष्ठान र पौराणिक स्थानमा ‘रामज्योति’ प्रज्वलन गरिने छ । अयोध्यालाई सरयू नदीको किनारको माटोबाट बनेको बत्तीले उज्यालो बनाइनेछ । रामलला, कनक भवन, हनुमानगढी, गुप्ताघाट, सरयु बीच, लता मंगेशकर चोक, मणिराम दास क्यान्टोनमेन्टलगायत एक सय मन्दिर, प्रमुख चोक, सार्वजनिक स्थानमा दीप प्रज्वलन गरिने छ ।
