काठमाडौं । पोखरामा जारी चौथो टाइगर कप भलिबल प्रतियोगितामा नेपाल एपिएफ क्लबको महिला टोली फाइनलमा प्रवेश गरेको छ ।
बिहीबार भएको पहिलो सेमिफाइनल खेलमा त्रिभुवन आर्मी क्लबलाई ३–२ को सेटमा हराउँदै एपिएफ उपाधि नजिक पुगेको हो ।
आर्मीले सुरुवाती सेट २५-१९ र दोस्रो सेट २५-२० ले जित्यो । त्यसपछि एपिएफले २५-१२ र २५-१६ को अन्तरले जित दर्ता गर्दै पुनरागमन गर्यो। पाँचौ सेटमा आर्मीमाथि पुनरागमन गर्दै एपिएफले १५-१३ को जितसहित फाइनलमा स्थान बनायो ।
एपीएफ समूह ‘ए’ बाट समूह विजेता र आर्मी समूह ‘बी’कोतर्फ उपविजेता बन्दै सेमिफाइनलमा पुगेको थियो । दोस्रो सेमिफाइनलमा समूह बी को शीर्षस्थानमा रहेर अघि बढेको चन्द्रागिरी नगरपालिका न्यु डायमन्ड र नेपाल पुलिस क्लबले भिड्नेछन् ।
प्रतियोगितामा एक विदेशी टिमसहित ६ टोली सहभागी थिए । जसमा आमन्त्रित टोली हरियाणा क्लब र घरेलु टोली गण्डकी प्रदेश समूह चरणबाटै बाहिरिइसकेका छन् ।
महिलातर्फको विजेता टोलीले समान ५ लाख ५५ हजार ५ सय ५५, दोस्रो हुनेले २ लाख ५५ हजार ५ सय ५५ तथा तेस्रो हुनेले १ लाख २५ हजार ५ सय ५५ रुपैयाँ प्राप्त गर्नेछन् ।
