काठमाडौँ । प्रधानमन्त्री शेरबहादुर देउवा अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी) सम्झौतालाई संसदबाट अविलम्ब पारित गराउन प्रतिबद्ध रहेका बेला सभामुख अग्निप्रसाद सापकोटाले यसका लागि सर्वदलीय सहमति आवश्यक रहेको बताउनुभएको छ ।
सभामुख सापकोटाका प्रेसविज्ञ श्रीधर न्यौपानले सभामुखको भनाइ उद्धृत गर्दै न्यूजपोलारसँग भन्नुभयो, “एमसीसी संसद्को मात्र विषय रहेन, यो नागरिकस्तरमा पनि धेरै बहस र छलफल भएको विषय हो, दलहरुले राष्ट्रिय सहमति खोजेर मात्र संसद्मा आउनुपर्छ, एमसीसीका विषयमा सर्वदलीय सर्वपक्षीयरुपमा सहमत भएर आउनुस् । दलहरु निर्णायक हुँदा मेरो अरु केही भन्नु छैन ।”
संसद् सुचारु नहुँदा यस्ता विषयमा छलफल गर्न नसकिएको भन्दै सभामुख सापकोटाले दलहरुलाई संसद् सुचारु गर्न वातावरण बनाउन आग्रह गर्नुभयो । उहाँका अनुसार एमसीसीजस्ता जस्तो विषयमा राष्ट्रिय सर्वदलीय छलफल गर्न पनि संसद् सुचारु हुनुपर्ने स्पष्ट गर्नुभयो । उहाँले मुख्य गरेर तीन कुरा– एमसीसीमा राष्ट्रिय सहमति, जनस्तरबाट उठेका प्रश्नको निरुपण र संसद्को अवरोध अन्त्य गर्नमा दलहरुलाई केन्द्रीत हुन आग्रह गर्नुभएको छ ।
पछिल्ला केही दिनयता एमसीसीबारे राजनीतिक दल, नागरिक समाजलगायतका क्षेत्र ध्रुवीकृत भइरहँदा सभामुख अग्नि सापकोटाले पनि विभिन्न पक्षसँग परामर्श गर्नुभएको छ । प्रधानमन्त्री देउवाले एमसीसी सम्झौता पारित गराउन अवरोध भए सत्ता गठबन्धन तोड्न आफू बाध्य हुने सत्ता गठबन्धनका साझेदारहरुलाई चेतावनी दिँदै नेकपा एमालेसँग वार्ता अगाडि बढाउनुभएको बताइएको छ । एमसीसीलाई हुबहु पारित गर्न नहुने पक्षमा रहेका सत्ता गठबन्धनका नेकपा माओवादी (केन्द्र) नेकपा (एकीकृत समाजवादी) ले सत्ता गठबन्धनमा समस्या आउने बताएका छन् ।
