एजेन्सी । कर्नाटकका प्रखर चतुर्वेदीले सोमबार यु–१९ कुचबिहार ट्रफीको फाइनलमा मुम्बईविरुद्ध ६३६ बलमा अविजित ४०४ रन बनाएर इतिहास रचेका छन् ।
उनले युवराज सिंहको २५ वर्ष पुरानो प्रतियोगितामा उत्कृष्ट स्कोरर बन्ने कीर्तिमान समेत तोडेका छन् । पूर्व भारतीय अलराउन्डर युवराज सिंहले सन् १९९९ मा पञ्जाबबाट खेल्दै बिहारविरुद्ध ३५८ रनको इनिङ खेलेका थिए ।
महेन्द्र सिंह धोनी पनि बिहारको टोलीमा खेलेका थिए । भारतको प्रमुख अन्डर-१९ घरेलु प्रतियोगितामा उत्कृष्ट व्यक्तिगत स्कोरको कीर्तिमान भने विजय जोलको नाममा छ, जसले महाराष्ट्रका लागि आसामविरुद्ध ४५१ (नटआउट) रन बनाएका थिए ।
बीसीसीआईले आफ्नो सामाजिक सञ्जाल ह्यान्डल मार्फत जानकारी दिएको छ कि चतुर्वेदीले आफ्नो ऐतिहासिक पारीमा ४६ चौका र तीन छक्का प्रहार गरेका छन् । बीसीसीआईले पोस्ट गरेको छ, ‘कर्नाटकका प्रखर चतुर्वेदी कुचबिहार ट्रफीको फाइनलमा ४०० रन बनाउने पहिलो ब्याट्सम्यान बनेका छन् । उनले मुम्बईविरुद्ध अविजित ४०४ रन बनाए । चतुर्वेदीको इनिङ्सको मद्दतले मुम्बईको ३८० रनको जवाफमा कर्नाटकले ८९०/८ रन बनायो । पहिलो इनिङ्समा कर्नाटकले अग्रता लिएपछि खेल बराबरीमा टुंगिएको थियो ।
प्रखर चतुर्वेदीले ४०० रनको आँकडा पार गरेपछि खेल समाप्त भएको घोषणा गरिएको थियो । कर्नाटकका लागि हर्षिल धामानी (१७९) ले पनि उत्कृष्ट योगदान दिए ।
प्रखर चतुर्वेदीले फाइनल खेलमा अविजित ४०४ रन बनाएर वेस्ट इन्डिजका पूर्व महान ब्याट्सम्यान ब्रायन लाराको सम्झना गराए । लाराले सन् २००५ मा इङ्ल्यान्डविरुद्ध अविजित ४०० रन बनाएका थिए । लारा अन्तर्राष्ट्रिय क्रिकेटमा ४०० रन बनाउने एकमात्र ब्याट्सम्यान हुन् । प्रखर चतुर्वेदीले लाराजस्तै अदभुत प्रदर्शन गरेकाले उनीबाट क्रिकेट फ्यानहरुको अपेक्षा बढेको छ ।
