काठमाडौँ । काठमाडौँ महानगरपालिकाको वातावरण व्यवस्थापन विभाग र महानगर प्रहरी बलले संयुक्त जनशक्ति परिचालन गरेर बल्खु खोलामा जम्मा भएको फोहोर निकालेका छन् ।
खोलाको माथिल्लो सतहमा प्लाष्टिक, घरेलु फोहोरको तह थियो । यो तह निकाल्न जेट मेसिनबाट पानीको प्रेसर दिइएको थियो । गहिरो ठाउँ भएकोले त्यस ठाउँमा पुग्न कठिन थियो । यसकारण सफाइका लागि बोटको प्रयोग गरिएको थियो ।
सरसफाइका लागि ४ वटा जेट मेसिनको प्रयोग भयो । वातावरण व्यवस्थापन विभागका प्रमुख रविनमान श्रेष्ठले, ३० जना जनशक्तिले १ सय मिटर नदी सफाइ गर्दा १० मेट्रिक टन फोहोर संकलन भएको जानकारी दिनुभयो ।
‘नदी सफाइ’ स्वर्णिम योजनाअन्तर्गत नदी सफाइको काम भएको हो । कार्यक्रमका फोकल पर्सन सानुमैयाँ महर्जनले भन्नुभयो, ‘नदी सफाइ गर्ने र नदी सभ्यता जोगाउन स्थानीयलाई जागरुक बनाउने कार्यक्रमका क्रियाकलाप हुन् । सफाइ भएका ठाउँमा फेरि फोहोर नगर्न स्थानीयमा सचेतनाका कार्यक्रम चल्नेछन् ।’
तस्विर : कृष्ण कट्टेल / काठमाडौँ महानगरपालिका
