काठमाडौं । राप्रपाका निर्देशन समितिका अध्यक्ष डा. प्रकाशचन्द्र लोहनीले कोशी प्रदेशको सभामुखमा उम्मेदबार दिने पार्टीको निर्णय गलत भएको भन्दै उम्मेदवारी फिर्ता लिन निर्देशन दिनु भएको छ ।
आज बसेको पार्टीको निर्देशक समितिको बैठकमा लोहनीले सभामुखको उम्मेदवारी फिर्ता गर्न आवश्यक कदम चाल्न केन्द्रीय कार्य समितिलाई निर्देशन गर्नुभएको हो ।
नेता लोहनीले न्युजपोलारसंग भन्नुभयो “पार्टी अध्यक्ष समेत सहभागिता रहेको पार्टीको पदाधिकारी बैठकमा कोशी प्रदेशको सभामुख पदामा उम्मेदवारी दिने वा नदिने भन्ने बुँदामा व्यापक छलफल भएको हो । छलफलमा पार्टीले संञ्चालन गर्ने आन्दोलनलाई समेत दृष्टिगत गर्दा पदमा जानु उपयुक्त नहुने सहमति भएको हो । तर यस बिपरित आज कोशी प्रदेशमा सभामुखको लागि उम्मेदवारी दिनु भएको छ । अत निर्देशन समितिले सभामुखको उम्मेदवारी फिर्ता गर्न आवश्यक कदम चाल्न केन्द्रीय कार्य समितिलाई निर्देशन गर्दछ ।”
यसैबीच कोशी प्रदेशको सभामुखमा राप्रपाका अम्बरबहादुर विष्ट निर्विरोध निर्वाचित हुनु भएको छ । मंगलबार बसेको प्रदेशसभा बैठकमा उपसभामुख सृजना दनुवारले विष्टलाई निर्विरोध निर्वाचित भएको घोषणा गरेकी हुन् । उहाँको प्रस्तावकमा राप्रपा संसदीय दलका नेता भक्ति सिटौला र प्रदेशसभा सदस्य प्रेमराज थामसुहाङ समर्थक जनाउनु भएको थियो ।
