गलकोट । बागलुङ नगरपालिका–४ कुडुँले स्थित शालग्राम सङ्ग्रहालय एक पटक पुग्नै पर्ने गन्तव्य बनेको छ । यहाँ एकै पटक सवा एक लाख शालिग्राम दर्शन गर्न पाइने भएपछि पर्यटकको सङ्ख्या बढेको छ ।
सुरुङभित्र कालीगण्डकीको शिर दामोदरकुण्डदेखि त्रिवेणीधामसम्मको आकृति एकै ठाउँमा बनाइएको छ । जसले धेरैलाई आकर्षित गर्ने गर्छ । अझ बढी त शालग्राम वरपर बनेका मन्दिर र त्यहाँ बनेका अनेक प्रकारका आकृतिले लोभ्याउने गर्छ ।
बागलुङ–बेनी सडक खण्डको केही माथिपट्टि रहेको सङ्ग्रहालय बागलुङ बजारदेखि करिब तीन किलोमिटर पश्चिममा पर्छ । पैदल यात्रामार्फत १५ मिनेट र गाडीमा पाँच मिनेटमा पुग्न सकिन्छ ।
सङ्ग्रहालयका अध्यक्ष ऋषि प्रपन्नाचार्यका अनुसार यहाँ मुस्ताङको मुक्तिनाथदेखि म्याग्दी, बागलुङ र पर्वत भएर बहने कालिगण्डकी (कृष्णगण्डकी) नदीमा मात्र पाइने शालग्राम सहित अन्य भू भागमा पाइने शालग्राम संरक्षण गरिएकाे छ ।
सङ्ग्रहालयको प्रवेशद्वार बाघको मुखको आकृति बनाइएको छ । भगवान शिवको अस्त्र त्रिशूल आकारमा भू–गर्भभित्र ७६ मिटर लामो सुरुङ निर्माण गरिएको छ । सङ्ग्रहालयमा तीन सय केजी तौलसम्मका शालिग्राम सङ्ग्रहित गरिएको छ ।
