वासिंटन । अमेरिकी राष्ट्रपति जो बाइडेनले दुई हजार अमेरिकी सेनालाई पोल्याण्ड र जर्मनीमा तैनाथ गर्न आदेश दिएका छन् । बिहीबार पेन्टागनले दिएको जानकारी अनुसार थप एक हजार सेनालाई जर्मनीबाट रोमानियामा सार्ने तयारी भइरहेको छ ।
त्यसो गरेर बाइडेनले युक्रेनमा रूसी सैन्य आक्रमणको डरको बीचमा नेटोको पूर्वी भागमा आफ्ना सहयोगीहरूप्रति अमेरिकाको वफादारी देखाउन खोजिरहेका छन्।
रुसले यस कदमको विरोध गर्दै सेनाको तैनाथीलाई निराधार र ‘विपत्तिजनक’ भन्यो। रुसी राष्ट्रपति भ्लादिमिर पुटिनले बेलायती प्रधानमन्त्री बोरिस जोनसनसँग पनि फोनवार्ता गरेका छन् । तर दुवै देशका सरकारका विज्ञप्तिबाट भने यस विषयमा सहमति हुन नसकेको देखिन्छ ।
फानवार्तामा पुटिनले पश्चिमले रूसको सुरक्षा चिन्ताहरूमा कुनै ध्यान नदिएको बताएका छन् । बेलायती प्रधानमन्त्री जोनसनले युक्रेनी सीमामा रुसको ‘शत्रुतापूर्ण गतिविधि’ बारे गहिरो चिन्ता व्यक्त गर्दै त्यहाँ एक लाख रूसी सेना तैनाथ गरेको बताए ।
बाइडेन प्रशासनले अब संकटको कूटनीतिक समाधान खोज्ने प्रयासलाई कमजोर नगरी अमेरिकी प्रतिबद्धता देखाउने प्रयास गरिरहेको छ। तर बाइडेन प्रशासनले नेटोको पूर्वी भागमा रहेका बाल्टिक देश इस्टोनिया, लाटभिया र लिथुआनियामा सेना पठाएको छैन।
पेन्टागनका प्रेस सेक्रेटरी जोन किर्बीले अमेरिकी सेनाको तुरुन्तै तैनाथीले अमेरिका र सहयोगीहरूको मनोबल बढाउने उद्देश्य राखेको बताए। “यो स्थायी कारवाही होइन”, उनले भने। उनले रुसले युक्रेनको सिमानामा लगातार सेना तैनाथ गरिरहेको बताए ।
यसैबीच रुसी उपविदेशमन्त्री अलेक्ज्याण्डर ग्रुस्कोले इन्टरफ्याक्स समाचार एजेन्सीलाई भनेका छन्, “निराधार विध्वंसक उपायहरूले सैन्य तनाव मात्र बढाउनेछ र राजनीतिक निर्णयहरूको दायरा कम गर्नेछ।” एपी
