काठमाडौँ । प्रधानमन्त्री कप राष्ट्रिय महिला टी– २० क्रिकेट प्रतियोगिता आज बिहीबारदेखि सुरु भएको छ ।
राष्ट्रिय खेलकुद परिषद्का सदस्य–सचिव टंकलाल घिसिङले नयाँ संरचनामा आजदेखि सुरु भएको प्रतियोगिताको उद्घाटन गर्नु भयो ।
सहभागी ८ टोलीले सुरुमा एक आपसमा राउन्ड रोविन लिगका आधारमा प्रतिस्पर्धा गर्ने छन् । राउन्ड रोविन लिगपछि प्लेअफ हुँदै उपाधिका लागि प्रतिस्पर्धा गराइने छ । विगतका संस्करणमा सहभागी टोलीलाई २ समूहमा विभाजन गरी लिग कम नकआउट आधारमा खेलाइएको थियो ।
उद्घाटनका अवसरमा बुधबार स्वर्गारोहण हुनु भएका पाल्पा जिल्ला क्रिकेट संघका अध्यक्ष एवं लुम्बिनी प्रदेश क्रिकेट संघका कोषाध्यक्ष राजेश श्रेष्ठको दिवंगत आत्माको चिर शान्तिको कामना गर्दै एक मिनेट मौन धारण गरिएको थियो ।
कार्यक्रममा राष्ट्रिय खेलकुद परिषद्का कार्यकारी एवं बोर्ड सदस्य एकेन्द्र कुँवर, बोर्ड सदस्य पेम्बा डोल्मा लामा र लेखबहादुर क्षेत्री, प्रशासन विभागका प्रमुख प्रेमबहादुर मल्ल, नेपाल क्रिकेट संघका सचिव पारस खड्कालगायतको उपस्थिति रहेको थियो ।
