एजेन्सी । अभिनेत्री आलिया भट्ट प्रमुख भूमिकामा रहेको तथा सञ्जय लीला भन्साली निर्देशित फिल्म ‘गंगुवाई काठियावाडी’ विवादमा घेरिएको छ ।
फिल्मको टिजर सार्वजनिक भएसँगै यस फिल्मले विभिन्न विरोधको सामना गर्नुपरेको छ । यसका साथै फिल्मले कानुनी विवादको पनि सामना गर्नुपर्ने भएको छ ।
मानहानीको मामलामा मुम्बईको अदालतले निर्देशक भन्साली, फिल्मकी अभिनेत्री आलिया र लेखकलाई उपस्थित हुन आदेश दिएको छ । यस फिल्मलाई लिएर आफूलाई गंगुवाईका धर्मपुत्र दाबी गर्ने बाबु रावजी शाहले मझगाउँ अदालतमा मानहानीको मुद्दा दर्ता गरेका हुन् ।
जसअनुसार अदालतले भन्साली, आलिया भट्ट र फिल्मका लेखकलाई मे २१ मा अदालतमा उपस्थित हुन आदेश दिएको हो । यसभन्दा पहिले शाहले मुम्बईको सिभिल अदालतमा फिल्मको ट्रेलरलाई रोक लगाउन माग गर्दै मुद्दा दर्ता गरेका थिए ।
तर यसलाई अदालतले अस्वीकार गरेको थियो । यो फिल्म ३० जुलाईमा प्रदर्शनमा आउँदैंछ । फिल्ममा आलिया भट्ट गंगुवाईको भूमिकामा देखा पर्दैछिन् । गंगुवाई १९६० को दशकमा मुम्बईको ‘रेड लाइट एरिया’को कमाठीपुराकी सबैभन्दा शक्तिशाली एवं सम्मानित ‘म्याडम’ थिइन् ।
