काठमाडौँ । नेकपा (एमाले) को संकल्प यात्रा विथोल्न खोजेको आरोपमा प्रहरीले पूर्वमन्त्री गोपाल किराँतीसहित १० जनालाई पक्राउ गरेको छ ।
संकल्प यात्रालाई कोशी प्रदेशमा रोक्ने घोषणा गर्दै मन्त्री किराँती हलेसीको सडकमा उत्रिनुभएको थियो । त्यसपछि प्रहरीले उहाँसहित १० जनालाई पक्राउ गरिएको कोशी प्रदेशका डीआईजी राजेशनाथ बास्तोलाले जानकारी दिनुभयो ।
एमालेको मध्यपहाडी राजमार्ग केन्द्रीत संकल्प यात्रालाई रोक्न भन्दै पहिचान पक्षधरले पहाडी जिल्लामा बन्द आह्वान गरेका थिए ।
कोशी प्रदेशको पुन:नामाङ्कनको माग गर्दै संघर्षमा उत्रिएको प्रदेश १ पुन: नामांकन संयुक्त संघर्ष समितिले संकल्प यात्रालाई प्रदेशमा प्रवेश गर्न नदिने घोषणा गरेको छ। सोही घोषाणअनुसार समितिले पहाडी जिल्लामा बन्द आह्वान गरेको छ । आन्दोलनकारीले एमालेको यात्रा रोक्नका लागि मध्यपहाडी लोकमार्गको ठाउँ–ठाउँमा रूख ढालेर अवरोध गरेका छन् ।
बन्द भए पनि एमालेको संकल्प यात्राको टोली उदयपुर आउनेक्रममा रहेको एमाले कोशी अध्यक्ष घनश्याम खतिवडाले जानकारी दिनुभयो ।
मध्यपहाडी लोकमार्ग केन्द्रित झुलाघाट–चिवाभञ्ज्याङ समृद्धिका लागि संकल्प यात्राका एमाले अध्यक्ष केपी शर्मा ओलीसहित नेताहरू सहभागी हुनुहुन्छ । प्रदेशको नाम नमान्ने घोषणा गरेको पहिचान पक्षधरले कोशीको पक्षमा बोल्ने एमाले नेतालाई निषेध गर्दे बताउँदै आएको छ ।
