काठमाडौँ । जनता समाजवादी पार्टी (जसपा) ले पार्टीको राजनीतिक समिति र केन्द्रीय समितिको बैठक बोलाएको छ । सोमबार बसेको केन्द्रीय कार्यकारिणी समितिको बैठकले आगामी पुस २५ र २६ गते राजनीतिक समिति र पुस २७ गते केन्द्रीय समितिको बैठक गर्ने निर्णय गरेको छ ।
त्यसैगरी बैठकले राष्ट्रियसभाको निर्वाचनमा पार्टीका तर्फबाट उम्मेदवार छनोट गर्न आगामी पुस १० गते केन्द्रीय कार्यकारिणी समितिको बैठक बस्ने निर्णय गरेको छ ।
बैठकले पार्टीका केन्द्रीय कार्यकारिणी सदस्य एवं संगठन विभाग प्रमुख राजेन्द्रप्रसाद श्रेष्ठको नेतृत्वमा सातै प्रदेश समितिका इन्चार्ज सदस्य रहने गरी आठ सदस्यीय कार्यदल गठन गरेको छ ।
उक्त कार्यदलले पार्टीको केन्द्रीय नेताहरुको जिम्मेबारी बाँडफाँटका लागि प्रस्ताव तयार पार्ने बताइएको छ ।
बैठकले केन्द्रीय कार्यालय सचिवमा पेशल ढकाललाई चयन गरेको छ । आगामी माघ ११ गते हुने राष्ट्रियसभा निर्वाचन प्रयोजनका लागि निर्धारित समयमै दल दर्ता गर्ने समेत बैठकले निर्णय गरेको छ ।
पार्टीले यसबीच सञ्चालन गरेको प्रदेशस्तरीय प्रशिक्षण अभियान प्रभावकारी रहेको बैठकको निष्कर्ष छ । यसैगरी एनसेल खरिदबिक्री प्रक्रिया रोकेर उक्त घटनाको छानबिन गर्न र दोषीमाथि कारबाही गर्न पार्टीले सरकारसमक्ष आग्रह गरेको छ ।
चुरे उत्खनन तथा गिट्टी बालुवा निकासी पैठारीसम्बन्धी सरकारले तयार पारेको विधेयक तत्काल फिर्ता लिनसमेत पार्टीले सरकारलाई अनुरोध गर्ने बैठकले निर्णय गरेको छ ।
बैठकले पार्टीले सञ्चालन गरेको तीन महिने संगठन विस्तार तथा सुदृढीकरण अभियानको समीक्षासमेत गरेको छ । उक्त अभियानलाई पुस मसान्तसम्म निरन्तरता दिने निर्णय भएको छ ।
