काठमाडौँ । अधिवक्ताद्वय मोहना अन्सारी र शैलेन्द्र प्रसाद अम्बेडकर (हरिजन) ले विसं २०७४ जेठ ११ गते नेपाल सरकारद्वारा राजपत्रमा प्रकाशित सूचनाअनुसार लुम्बिनी सहित बिभिन्न प्रदेशमा थप भएका केही गाउँपालिका तथा नगरपालिकामा निर्वाचन गर्न/गराउन निर्वाचन आयोगको ध्यानाकर्षण गराउनुभएको छ ।
उहाँहरुले निर्वाचन आयोगमा बुझाउनुभएको ध्यानाकर्षण पत्रमा राजपत्रमा तराई/मधेशका केही जिल्लामा केही गाउँपालिका/नगरपालिका थप गरेको देखिएकाले सोही मितिको सेरोफेरोमा भएको लुम्बिनी प्रदेशको स्थानीय निर्वाचन लुम्बिनी प्रदेशमा थप भएको गाउँपालिका/नगरपालिकामा निर्वाचन हुन नसकेको उल्लेख छ ।
मधेश प्रदेशलगायतका केही अन्य प्रदेशमा निर्वाचन तेस्रो चरणको भएकाले थप पालिकाहरुमा निर्वाचन भई कार्यान्वयन भएको भन्दै उहाँहरुले राजपत्रमा प्रकाशित सूचनामा लुम्बिनी प्रदेशमा थप भएका पालिकाहरुमा निर्वाचन गराउन माग गर्नुभएको हो । ध्यानाकर्षण पत्रमा नवलपरासी, रुपन्देही, कपिलवस्तु र बाँके जिल्लामा थप भएका र कायम भएका पालिकाहरुमा निर्वाचन गराउन माग गरिएको छ ।
