![](https://newspolar.com/wp-content/uploads/2023/11/rasopa.jpg)
काठमाडौँ । राष्ट्रिय स्वतन्त्र पार्टीको केन्द्रीय समिति ५२ सदस्यीय बनेको छ ।
जलेश्वरमा बसेको केन्द्रीय समिति बैठकले १४ सांसदलाई केन्द्रीय कार्यसमितिमा मनोनीत गरेसँगै केन्द्रीय समिति सदस्यको कुल सङ्ख्या ५२ पुगेको हो ।
केन्द्रीय कार्यसमिति बाहिर रहेका पार्टीका १४ जना सांसदलाई केन्द्रीय समितिमा ल्याउने निर्णय भएको रास्वपाका उपसभापति डोलप्रसाद अर्यालले जानकारी दिए ।
केन्द्रीय सदस्यमा मनोनीत हुनेहरूमा दलका उपनेता विराजभक्त श्रेष्ठ, प्रमुख सचेतक सन्तोष परियार, सचेतक निशा डाँगी, सांसद मनिष झा, डा तोसिमा कार्की, शिशिर खनाल, हरि ढकाल, डा स्वर्णिम वाग्ले, डा चन्दा कार्की (भण्डारी), असीम शाह, लक्ष्मी तिवारी, अशोक कुमार चौधरी, शिव नेपाली र विनीता कठायत रहेका छन् ।
यसअघि केन्द्रीय सदस्यमा सभापति रवि लामिछाने, उपसभापति डोलप्रसाद अर्याल, सोविता गौतम, सुमना श्रेष्ठ, गणेश पराजुली र विन्दवासिनी कंसाकार गरी ६ जना मात्र थिए ।