काठमाडौं । परराष्ट्रमन्त्री प्रदीप ज्ञवालीले म्यान्मारमा जारी हिंसाप्रति नेपाल सरकारले गहिरो चिन्ता र चासो जनाएको बताउनुभएको छ ।
प्रतिनिधिसभामाको सोमबारको बैठकमा सांसदहरुले उठाएका प्रश्नको जवाफ दिँदै मन्त्री ज्ञवालीले म्यान्मार घटनाप्रति राष्टसंघले पारित गरेको प्रस्तावलाई नेपालले समर्थन गरिसकेको जानकारी दिनुभयो ।
उहाँले शान्तिपूर्ण प्रदर्शनमा धेरै निहत्था नागरिकको ज्यान गएको आफूहरुले देखेको जनाउँदै नेपालको विदेश नीतिको आधारभूत पक्ष मानव अधिकार र लोकतन्त्र भएको तथा नेपाल सरकारकाले जुनसुकै किसिमको हिंसाको विरोध गर्नेछ भन्नुभयो ।
मन्त्री ज्ञवालीले भन्नुभयो, हामीले म्यान्मारका नागरिक नेताहरुलाई हिरासतमा लिने सैनिक सरकारको कदमबारे तत्कालै विज्ञप्ति निकालेर विरोध गरेका छौं ।
हालै सम्पन्न बिम्स्टेकस्तरीय परराष्ट्र मन्त्रीहरूको बैठकमा म्यान्मार हिंसाबारे कुरा किन नठाएको भन्ने सांसदहरूको प्रश्नको समेत मन्त्री ज्ञवालीले जवाफ दिँदै बिम्स्टेक जस्ता मञ्चमा दुई पक्षीय विषय वा कुनै खास देशका घटनाबारे छलफल गर्न नमिल्ने स्पष्ट गर्नुभयो ।
मन्त्री ज्ञवालीले नेपाल बोल्नुपर्ने ठाउँमा बोलेको भन्दै भन्नुभयो, ‘जहाँ बोल्नुपर्ने हो, जुन फोरमबाट भन्नुपर्ने हो, त्यहाँबाट बिना संकोच नेपालले उठाउने गर्छ। त्यसरी नै नेपालले उठाइरहेको छ।’
म्यान्मारमा सैन्य कु को विरोधमा प्रदर्शनमा उत्रिएका ५०० भन्दा बढी व्यक्तिको सेनाको कारबाहीमा ज्यान गइसकेको छ । नेसनल लिग फर डेमोक्रेसीकी नेतृ आङ सान सुकी, राष्ट्पति समेतका विपक्षी नेताहरु सेनाको हिरासतमा रहेका छन् ।
