एजेन्सी । अमेजनका मालिक जेफ बेजोस विश्वका सर्वाधिक धनाढ्यको सूचीमा फेरि शीर्ष स्थानमा उक्लिएका छन् ।
फोर्ब्सले जारी गरेको ३५ औं वार्षिक सूची अनुसार यस वर्ष बेजोसको कूल सम्पत्ति १८८.५ बिलियन अमेरिकी डलर पुगेको छ । यद्यपि उनको सम्पत्तिमा ११५ मिलियन डलर ह्रास आएपनि उनी शीर्ष स्थानमा नै पर्न सफल भएका हुन् । गतवर्ष पनि उनी धनाढ्यको पहिलो स्थानमै थिए ।
सूचीको दोस्रो स्थानमा टेस्ला स्पेसएक्सका मालिक एलन मस्क रहेका छन् । ४९ वर्षीय मस्कको सम्पत्ती १६९.९ बिलियन डलर रहेको छ । यसवर्ष उनको सम्पत्तिमा ११६ मिलियन डलरको वृद्धि भएको छ ।
यस्तै तेस्रो स्थानमा फ्रान्सका बर्नार्ड अर्नल्ट एण्ड फेमिली रहेका छन् । उनीहरुले पेरिसमा विलासी वस्तुको उत्पादन गर्ने गर्छन् । उनको कूल सम्पत्ति १६३.७ बिलियन डलर रहेको छ । यसवर्ष उनको सम्पत्तिमा १ बिलियन डलर थपिएको छ ।
कुनै समय लगातार धनाढ्यको पहिलो स्थानमा रहँदै आएका माइक्रोसफ्टका मालिक बिल गेट्स १२९.२ बिलियन डलरसहित चौथो स्थानमा छन् । उनको यसवर्ष कूल सम्पत्तिमा १०५ मिलियन ह्रास आएको छ ।
फेसबुकमा संस्थापक मार्क जुकरबर्ग सूचीको पाँचौं स्थानमा पर्न सफल भएका छन् । ३६ वर्षीय जुकरबर्गको कूल सम्पत्ति १११.६ बिलियन डलर रहेको छ । उनको सम्पत्ति पनि यसवर्ष ९५१ मिलियन डलर घटेको छ ।
यस्तै कूल सम्पत्ति ९९.८ बिलियन डलरसहित बहुराष्ट्रिय कम्पनीका मालिक वारेन बुफेट छैटौं स्थानमा पर्न सफल भएका छन् । उनको सम्पत्ति ३४० मिलियन डलर बढेको छ ।
सूचीको क्रमशः सातौं, आठौं र नवौं स्थानमा ल्यारी एलिसन, ल्यारी पेज, सर्जे ब्रिन रहेका छन् । भारतका धनाढ्य मुकेश अम्बानी ७७.३ बिलियन डलरसहित सूचीको दशौं स्थानमा रहेका छन् । उनको कूल सम्पत्तिमा ३८८ मिलियन डलर बढेको छ ।
