काठमाण्डौ । दुध नदिई थारो भयो या रोग लाग्यो उपचार गर्नुपर्छ भनेर अनि गाईले वाच्छीको साटो बाच्छो पायो भनेर त्यसलाई सडकमा छोडिदिने निर्दयी मानिसहरु पनि गाई र गोरु तिहारको दिन उनीहरुलाई पुजा गर्न गाई गोरु खोज्दै गाईगोठ पुग्ने गरेको भेटिन्छ ।
हिन्दु नेपालीहरुको दोस्रो ठुलो चाड तिहारको तेस्रो दिन लक्ष्मी पुजा/गाई तिहार र चौथो दिन गोरु तिहार/गोवद्र्धन पुजाको बेलामा गाई र गोरुको पुजा गरेमा पुण्य कमाइने किंवदन्ती रहेकोले पनि गाई गोरु खोज्दै गोठसम्म धाउने चलन नयाँ भने होइन् । नत्र किन जान्थे र ?
पछिल्लो समय शहरमा दुधको लागि शौखले गाई पाल्ने वाहेक गाइवाच्छा पालेर जीविका चलाउनेहरु नगन्य भेटिन थालेका छन् । त्यसको साटो आधुनिकतासंगै नयाँपुस्तामा गाईवाच्छा बेचेर भएपनि कुकुर पाल्ने प्रवृत्ति बढीरहेको छ । विगतको हेरिकन अहिले शहर नजिकका गाउँहरुमा पनि मुश्किलले गाई गोठ देख्नि पाइन्छ ।
गाईवस्तु पाल्ने पेशा धेरैले अंगाल्न छोडिसके
लक्ष्मी पुजा तथा गाई तिहारको दिन सोमबार एकाविहानैदेखि दिनभरीजसो नै कागेश्वरी मनोहरा वडा नं ९ गोठाटारस्थित असहाय गाईवाच्छा संरक्षण केन्द्रमा आश्रीत एउटी गाई र १४ वटा कोरेली वाच्छीलाई पुजा गर्ने स्थानीय वासिन्दादेखि अन्य ठाउँबाट पनि धेरै मानिसहरु आएको सो केन्द्रका संस्थापक उत्तम पुडासैनीले बताए ।
वर्षको अन्य ३६३ दिन सडकमा वेवारिसे अवस्थामा भेटिएका गाईवाच्छाको उद्धार गर्न केन्द्रका संस्थापक पुडासैनी र अन्य सदस्यहरु पशु एम्बुलेन्स लिएर पुग्नेगर्थे भने बाँकी दुईदिन अर्थात गाई र गोरु तिहारमा भने सर्वसाधारणहरु आफ्नो सवारी साधनमा पुजाको सामान र गाईवाच्छालाई खुवाउन खानेकुरा लिएर सो गाईगोठमा पुगेका हुन् ।
गाईवस्तुमा लाग्ने सरुवारोग लम्पी स्किन लागेर जीवन मरणको दोसाँधमा सडकमा भेटेर उद्धार गरि उपचार गरेपछि ती गाईबाट गत असोजको अन्त्यतिर एउटा वाच्छी जन्मिएकी थिइन् । सो गाई र तिनीबाट जन्मेको कोरेली वाच्छी गाई तिहारको दिनमा सबैको आकर्षणको केन्द्र बनेको थियो ।
केन्द्रले सोमबार लक्ष्मी पुजा र गाई तिहारको दिन सो गाई गोठमा आयोजना गरेको देउसीभैलो, शुभकामना आदानप्रदान तथा गाई पुजा कार्यक्रममा विभिन्न व्यक्तिहरुबाट एकलाख रुपैयाँ बराबरको पिठो, भुसा, नुन आदि जस्ता खाद्यान्नको साथै नगद डेढ लाख रुपैयाँ दक्षिणा र सहयोग जम्मा भएको पनि पुडासैनीले बताए ।
पुडासैनीका अनुसार मंगलबार गोरु तिहार र गोवद्र्धन पुजाको अवसरमा केन्द्रमा आश्रीत वहर (वाच्छा) लाई पुजा गर्न आउनेहरुको क्रम जारी रहेको छ र यो क्रम मंगलबार दिनभरी जारी रहनेछ ।
तस्वीरहरु- उत्तम पुडासैनी
