एजेन्सी । न्युजिल्याण्डका भारतीय मूलका ओपनर रचिन रविन्द्र आफ्ना हजुरबा–हजुरआमालाई भेट्न बेंगलुरु पुगेका छन् । रचिनका हजुरबा–हजुरआमा शिक्षक थिए । उनका हजुरबुवाको नाम बालकृष्ण अडिगा र हजुरआमाको नाम पूर्णिमा हो । दुवै दक्षिण बेंगलुरुमा बस्छन् ।
नाति घर आएपछि हजुरआमा पूर्णिमाले सबैभन्दा पहिले रचिनलाई ‘नजर उतारेकी’ थिइन् । यसको भिडियो सामाजिक सञ्जालमा भाइरल भइरहेको छ ।
रचिन विश्वकपमा श्रीलंकासँग खेल्न बैंगलोर पुगेका थिए । बैंगलोरको चिन्नास्वामी स्टेडियममा बिहीबार (९ नोभेम्बर) श्रीलंका र न्यूजिल्याण्डबीचको खेल भएको थियो ।
यो खेलमा न्युजिल्यान्डले श्रीलंकालाई ५ विकेटले हराएको थियो । टस जितेर ब्याटिङ गरेको श्रीलंकाको पुरै टोलीले १७१ रन मात्रै बनाउन सक्यो । लक्ष्य पछ्याउन उत्रिएको न्युजिल्यान्डको टोलीले ५ विकेटको क्षतिमा लक्ष्य पुरा गर्यो । रचिनले ३४ बलमा ४२ रनको इनिङ खेले । उनले आफ्नो इनिङ्समा ३ चौका र ३ छक्का पनि प्रहार गरे । रचिनले डेभोन कोनवेसँग मिलेर टोलीलाई बलियो सुरुवात गराए ।
रचिनका बुबा ९० को दशकमा न्युजिल्यान्ड गएका थिए । उनका बुबा रवि कृष्णमूर्ति क्रिकेटका ठूला फ्यान हुन् । उनी आफै बेंगलुरुमा क्लब क्रिकेट खेल्थे । रचिनको जन्म हुँदा उनका पिताले राहुल द्रविड र सचिन तेन्दुलकरको नाम जोडेर छोराको नाम रचिन राखेका थिए ।
