काठमाडौं । प्रधानमन्त्री केपी शर्मा ओलीले एमाले पार्टीको केन्द्रीय कमिटीको बैठक बोलाउनु भएको छ । वैशाख ६ गते ११ बजे बालुवाटारमा बैठक बोलाइएको बागमती प्रदेश सहइन्चार्ज शेरबहादुर तामाङले जानकारी दिनुभयो ।
अध्यक्ष ओलीको मन्तव्य, राजनीतिक प्रतिवेदन पेस, कार्यविभाजन, केही संगठनात्मक प्रस्ताव, उपनिर्वाचन तयारी, समसामयिक प्रस्तावमाथि छलफल गर्न बैठक बोलाइएको हो ।
यो बैठकले पार्टीको महाधिवेशनका विषयमा निर्णय गर्ने सहइन्चार्ज तामाङले बताउनुभयो । एमालेको विवाद बढ्दै जाँदा ओलीले महाधिवेशन केन्द्रित गतिविधि गरिरहनु भएको छ भने वरिष्ठ नेता माधवकुमार नेपाल समूहले देशभर समानान्तर संगठन निर्माण गरिरहनु भएको छ।
समानान्तर गतिविधि गरेको भन्दै ओलीले आफूलाई साथ दिनेहरुलाई विभिन्न जिम्मेवारी दिने तयारी पनि गर्नुभएको छ।
