एजेन्सी । भारतमा जारी एकदिवसीय विश्वकपमा ४८ खेलमध्ये ३१ खेलहरु सम्पन्न भइसकेका छन् । १० टोली सहभागी यस विश्वकपमा अन्तिम चार (सेमिफाइनल)मा स्थान बनाउनका लागि टोलीहरु प्रतिस्पर्धामा छन् ।
यद्यपि, बंगलादेश भने प्रतियोगिताबाट बाहिरिसकेको छ । भारत ६ खेलमध्ये सबै खेल जितेर अंकतालिकाको शीर्षस्थानमा छ । विश्वकप इतिहासमै एक खेल पनि नहारी उपाधि जित्ने टोलीबारे जान्नका लागि जोकोही क्रिकेट फ्यान उत्सुक हुने गर्छन् ।
सन् १९७५ देखि लिएर २०१९ सम्म आईपुग्दा केबल ६ राष्ट्रले मात्र विश्वकप जित्न सफल भएका छन् । ती पाँच राष्ट्रहरु वेस्ट इन्डिज, अष्ट्रेलिया, भारत, पाकिस्तान, श्रीलंका र इंग्ल्याण्ड हुन् । विश्वकपको पहिलो संस्करणदेखि लिएर २०१९ सम्म केबल दुई टोलीले प्रतियोगितामा एक खेल पनि नहारी उपाधि जितेका छन् ।
यो उपलब्धी विश्वकप जित्ने ६ टोलीमध्ये वेस्ट इन्डिज र अष्ट्रेलियाले हासिल गरेका छन् । सन् १९७५ मा क्लाइभ लयडको कप्तानीमा वेस्ट इन्डिजले पहिलो संस्करणमा प्रतियोगिताको सबै ५ खेलहरु जितेर च्याम्पियन बनेको थियो । यस्तै, सन् १९७९ मा वेस्ट इन्डिजले आफ्नो जीतलाई कायम राख्दै उपाधि जितेको थियो ।
सन् २००३ मा रिकि पोन्टिङको कप्तानीमा अष्ट्रेलियाले विश्वकपका सबै ११ खेलहरु जितेको थियो । यस्तै, २००७ मा पोन्टिङकै कप्तानीमा अष्ट्रेलियाले पुनः ११ खेलहरु जितेर च्याम्पियन बनेको थियो ।
