काठमाडौँ । आइसिसी टि-२० विश्वकप एसिया क्षेत्र छनोट भोलि (सोमबार) देखी नेपालमा सुरु हुँदैछ । भोली नेपालले पहिलो म्याच सिंगापुरविरुद्ध खेल्दैछ । किर्तीपुरस्थित टियू मैदानमा हुन लागेको खेल बिहान नौ बजेदेखि सुरु हुनेछ ।
प्रतियोगिता कार्तिक १३ देखी १९ सम्म मुलपानी र कीर्तिपुर मैदानमा हुने खेलहरुमा नेपालसहित आठ वटा देशले भाग लिनेछन् । ८ टीमलाई दुई समूहमा राखेर खेलाइने छ भने दुवै समूहका शीर्ष दुई टीम सेमिफाइनलमा प्रवेश गर्नेछन् । फाइनलमा पुग्ने दुई टीमले आगमी वर्ष अमेरिका र वेस्टइन्डिजमा हुने टि-२० विश्वकप खेल्न पाउनेछन् ।
नेपालको समूह ‘ए’ मा सिंगापुर, ओमान र मलेसिया रहेका छन् । समूह ‘बी’मा यूएई, हङकङ, कुवेत र बहराइन रहेका छन् । समूह ‘ए’बाट नेपाल र ओमान तथा समूह ‘बी’बाट यूएई र हङकङ सेमिफाइनलका दावेदार हुन् । नेपाल उपाधिको दावेदारसमेत हो ।
नेपाल भर्सेस सिंगापुर: दुबै टिमका इम्प्याक्ट खेलाडि
दीपेन्द्रसिंह ऐरी – नेपाल
अलराउण्डर दीपेन्द्रसिंह ऐरी घरेलु टोली नेपालका प्रमुख हतियार हुन् । दीपेन्द्र ब्याटिङ, बलिङ र फिल्डिङ तीनै क्षेत्रमा अनुभबी खेलाडि हुन्। दीपेन्द्रले नेपालको लागि ५२ टि२० आई खेलेका छन् । जसमा उनले १ शतक र ७ अर्धशतकसहित कुल १ हजार ३ सय ४४ रन बनाएका छन् । साथै उनले २५ विकेट पनि लिएका छन् ।
टोलीका प्रमुख अफ स्पिनर समेत रहेका दीपेन्द्रले नेपालबाट पाँचौं नम्बरमा खेल्दै फिनिसरको भूमिका निर्वाह गर्नेछन् ।त्रिकोणात्मक टि२० आई सिरिजमा उनले उच्च प्रदर्शन गरेका थिए । यस्तै, एसियन खेलकुदमा उनले मंगोलियाविरुद्ध ९ बलमै अर्धशतक प्रहार गरी विश्व रेकर्ड बनाएका थिए ।
सुरेन्द्रन चन्द्रमोहन – सिंगापुर
सिंगापुरका ओपनर ब्याटर सुरेन्द्रन चन्द्रमोहन टोलीका प्रमुख खेलाडी हुन् । उनले सिंगापुरको लागि ३३ टि२० आई खेलेका छन् । जसमा १ शतक र ३ अर्धशतकसहित कुल ७ सय ५६ रन बनाएका छन् ।
उनमा ओपनिङ र मध्यक्रम कुनैपनि स्थानमा राम्रो गर्न सक्ने क्षमता रहेको छ । उनले २०२२ मा पपुवा न्युगिनीविरुद्ध ५२ बलमा ७ चौका र ७ छक्कासहित १ सय रनको शतकीय इनिङ खेलेका थिए ।
नेपालको टोली:
रोहित पौडेल (कप्तान), कुशल भुर्तेल, आसिफ शेख, कुशल मल्ल, दीपेन्द्रसिंह ऐरी, सन्दीप जोरा, गुलशन झा, सोमपाल कामी, करण केसी, अभिनाश बोहरा, प्रतिश जि.सी, विवेक यादव, सन्दीप लामिछाने, ललित राजवंशी र विनोद भण्डारी ।
सिंगापुरको टोली:
अरित्र दत्त (कप्तान), रोहन रंगराजन, सुरेन्द्र चन्द्रमोहन, अनिश पराम, मनप्रीत सिंह, जनकप्रकाश, अक्षक रुपक पुरी, थिलिप थिलाप्पन, रमेश कलिमुथु, अनान्था कृष्णा, उत्सव रक्षित, अर्यान रसेल मेनन, अमात्र्य कौल, अर्याविर चौधरी र हर्ष भारद्धाज ।
