एजेन्सी । भारतको उत्तर प्रदेशमा कोरोना संक्रमण बढ्न थालेपछि आइतबारदेखि लकडाउन हुने भएको छ । दैनिक तीब्र गतीमा कोरोना संक्रमण बढेपछि उत्तर प्रदेश सरकारले अत्यावश्यक सेवा बाहेकका सवारी आवागमनमा रोक लगाउने, बजार पसल बन्द गराउने घोषणा गरेको हो ।
यस्तै उत्तर प्रदेश पूर्ण रुपमा बन्द गर्नुका साथै मास्क नलगाइ हिड्नेलाई पहिलो पटक १ हजार रुपैयाँ जरिवाना गर्ने र त्यसपछि फेरि समातिएमा १० हजार जरिवाना तिर्नु पर्ने बताइएको छ ।
यसअघि उत्तर प्रदेश सरकारले बिहीबार १५ मेसम्म सबै स्कुल बन्द गर्ने घोषणा गरेको थियो । साथै राज्यको बोर्ड परीक्षा पनि रद्द भएको थियो । भारतमा कोरोना संक्रमणको दोस्रो लहर सुरु भएसँगै दैनिक उच्च संख्यामा संक्रमित थपिदै आएका छन् । भारतमा पछिल्लो २४ घण्टाको अवधिमा मात्र थप २ लाख १६ हजार ८५० नयाँ संक्रमित थपिएका छन् ।
यसरी एकैदिन यति उच्च संख्यामा संक्रमित थपिएको यो कोरोना महामारी सुरु भएयताकै उच्च रहेको छ । गत २४ घण्टाकै अवधिमा भारतमा यसको संक्रमणबाट १ हजार १८३ जनाले ज्यान गुमाएका छन् ।
