विराटनगर । प्रदेश १ का मुख्यमन्त्री राजेन्द्रकुमार राईले मन्त्रिपरिषद् विस्तार गर्दै आइतबार आठ जना मन्त्री नियुक्त गरेका छन् । उनीहरुको शपथ ग्रहणको तयारी भइरहेको बताइएको छ । मुख्यमन्त्री राईले माओवादी केन्द्रका उपनेता रामकुमार राईलाई खानेपानी, सिँचाइ तथा ऊर्जामन्त्रीमा तथा सोही पार्टीका प्रमुख सचेतक झलकबहादुर मगरलाई कृषिमन्त्रीमा नियुक्त गरेका छन् ।
त्यसैगरी नेकपा (एकीकृत समाजवादी) का तर्फबाट राजन राई सामाजिक विकासमन्त्री, खिनु लङ्वा लिम्बू पर्यटन तथा संस्कृतिमन्त्री र उपेन्द्र घिमिरे सूचना, यातायात व्यवस्था तथा सञ्चारमन्त्रीमा नियुक्त भएका छन् । नेपाली कांग्रेसबाट शेखरचन्द्र थापा वन, वातावरण तथा भूसंरक्षणमन्त्री ओमप्रकाश सरावगी उद्योग, श्रम तथा रोजगारमन्त्री र प्रकाशप्रताप हाङ्गाम भूमि व्यवस्था, सहकारी तथा गरिबी निवारणमन्त्री बनेका छन् ।
आइतबार सत्तारुढ पाँच दलीय सरकारले मन्त्रालयको सङ्ख्या ७ बाट १२ बनाउने निर्णय गरे पनि एक मन्त्रालय थप गरेर मन्त्रालयको सङ्ख्या १३ पुर्याएको छ ।
