काठमाडौं । सरकारले मधेस तथा थरुहट–थारुवान आन्दोलनमा मधेशी नेता तथा कार्यकर्तामाथि लागेको मुद्दा फिर्ता लिने निर्णय गरेको छ ।
सोमबारको मन्त्रिपरिषद् बैठकले जसपाका नेता कार्यकर्तामाथि लागेको मुद्दा फिर्ता लिने निर्णय गरेको बालुवाटार स्रोतले जानकारी दिएको छ ।
एकजना मन्त्रीले दिएको जानकारी अनुसार सरकारले मधेश र थरुहट आन्दोलनका बेलामा जसपा संलग्न नेता तथा कार्यकर्ताहरुमाथि लगाइएको मुद्दा फिर्ता लिने निर्णय सोमबारको मन्त्रिपरिषद बैठकले गरेको हो ।
जसपासँग प्रधानमन्त्री केपी ओलीले सत्ता साझेदारिताको हात बढाएका छन् । यसै क्रममा आफ्ना माग पूरा गनुपर्ने माग सो दलले राखेको छ । सरकारले सोही बमोजिमको निर्णय गर्ने बताउँदै आएको थियो ।
प्रधानमन्त्री केपी शर्मा ओली र जसपाका नेता महन्थ ठाकुर लगायतबीच भएको छलफलका क्रममा ओलीले जसपाका नेता कार्यकर्ताविरुद्ध रहेका मुद्दा फिर्ता लिन सहमति भएको थियो ।
जसपाले आफ्ना नेता तथा कार्यकर्ताहरुलाई विभिन्न २४ किसिमका मुद्दा लगाइएको र त्यसमा २०८ जनाको मुद्दा फिर्ता लिन आग्रह गर्दै गृह मन्त्रालयमा फाइल पेश गरेको थियो ।
यसरी जसपाले पेश गरेको फाइल बमोजिम नै सरकारले सबै २०८ जनाकै मुद्दा फिर्ता लिएको हो या केहीको मात्रै हो भन्नेबारेमा भने स्पष्ट भएको छैन ।
यसमा पनि हत्या अभियोगमा थुनामा रहेका रेशम चौधरीको मुद्दा फिर्ता लिए नलिएको बारेमा पनि केही बताइएको छैन ।
