काठमाडौं । जापानको मेइहोकु कम्पनीले पोखरा महानगरपालिकालाई कोरोना भाइरस (कोभिड–१९) संक्रमण तथा रोकथामका लागि ३५ हजार थान मास्क प्रदान गरेको छ ।
पोखरा महानगरपालिकामा आयोजित एक विशेष कार्यक्रमबीच कम्पनीका अध्यक्ष शोगो अदाचीले पोखरा महानगरपालिकाका मेयर मानबहादुर जी.सी.लाई उक्त मास्क हस्तान्तरण गर्नुभएको हो ।
नेपालमा जापानिज भाषा कक्षा सञ्चालन गरिरहेको मेइहोकु ट्रेनिङ्ग प्रा.लि. को अगुवाईमा जापानको कितानागोया शहर अवस्थित मेइहोकु कम्पनीले पोखरा महानगरपालिकालाई करिब १७ लाख रुपैया बराबरको ३५ हजार थान मास्क उपलब्ध गराएको मेइहोकुका अध्यक्ष अदाचीले बताउनुभयो ।
कोरोना भाइरस (कोभिड–१९) को महामारीबाट आक्र्रान्त भइरहेको विषम परिस्थितिमा यसको संक्रमण रोकथाम तथा नियन्त्रणका लागि सहयोग गरिएको उहाँले बताउनुभयो ।
मास्कले कोरोना संक्रमण नियन्त्रणमा सहयोग पुग्ने बताउँदै, नगर प्रमुख जी.सी.ले नेपाल–जापानबीच सुमधुर सम्बन्ध रहेको र जापानको यस्तो सहयोगले नेपाल र नेपालीको मन जितेको बताउनुभयो ।
हस्तान्तरण कार्यक्रममा पोखरा महानगरपालिकाका उपमेयर मञ्जुदेवी गुरुङ्गलगायत महानगरपालिकाका कर्मचारी तथा अन्य विशिष्ट व्यक्तित्वहरुको उपस्थिति रहेको थियो ।
