काठमाडौंः नेकपा (माओवादी केन्द्र)को स्थायी कमिटी बैठकले केपी ओली सरकारलाई दिएको समर्थन फिर्ता लिने अनुमान गरिए पनि कुनै निर्णय हुन सकेन ।
पार्टी कार्यालय पेरिसडाँडामा मंगलबार बसेको स्थायी समिति बैठकमा सरकारको समर्थन गर्ने वा नगर्ने विषयमा सामान्य कुराकानी मात्र भएको पार्टी प्रवक्ता नारायणकाजी श्रेष्ठले जानकारी दिनुभयो ।
यद्यपी बैठक भोलि बुधबार पनि बस्नेछ ।
केपी ओली सरकारमा सहभागी मन्त्रीहरुलाई फिर्ता बोलाए पनि नेकपा (एमाले) मा गएका कारण गृहमन्त्री रामबहादुर थापा, टोपबहादुर रायमाझी, लेखराज भट्ट लगायतका नेताहरुको सांसद पद गुमिसकेको छ । तर उनीहरुलाई प्रधानमन्त्री केपी ओलीले मन्त्रीमण्डलमा पुनः नियुक्त गर्नु भएको छ ।
प्रधानमन्त्री केपी ओलीको विकल्पमा अर्को सरकार गठनको प्रयास गरिरहे पनि माओवादी केन्द्र, नेपाली काँग्रेस र जनता समाजवादी पार्टीबीच अझै समझदारी बनिसकेको छैन । खासगरी जनता समाजवादी पार्टी दुई धारमा उभिएपछि माओवादी केन्द्र पर्ख र हेरको अवस्थामा पुगेको छ ।
माओवादी केन्द्रका अध्यक्ष पुष्प कमल दाहाल प्रचण्डले नयाँ सरकार गठन हुने बताइरहनु भएपनि कुनै निष्कर्षमा पुग्न सकेको छैन ।
