काठमाडौँ । प्रधानमन्त्री शेरबहादुर देउवाले संसद्बाट एमसीसी सम्झौतालाई अनुमोदन गर्न प्रमुख प्रतिपक्षी नेकपा एमालेसँग सहयोग माग्नुभएको छ । प्रधानमन्त्री निवास बालुवाटारमा आइतबार भएको शीर्ष तीन नेताबीचको छलफलमा प्रधानमन्त्री देउवाले प्रमुख प्रतिपक्षी एमालेका अध्यक्ष केपी शर्मा ओलीसमक्ष त्यस्तो सहयोग माग्नुभएको हो ।
बालुवाटारमा प्रधानमन्त्री देउवा, एमाले अध्यक्ष ओली र सत्तारुढ गठबन्धनको एक घटक नेकपा माओवादी केन्द्रका अध्यक्ष पुष्पकमल दाहाल प्रचण्डबीच एमसीसी सम्झौता सम्बन्धमा करिब दुई घण्टा छलफल भएको थियो । भेटमा माओवादी अध्यक्ष प्रचण्डले प्रतिपक्षले संसद्लाई अवरोध नगरोस् र स्थानीय निकायको निर्वाचनपछि मात्र एमसीसीका बारेमा विचार गर्न प्रस्ताव गर्नुभएको छलफलमा सहभागी एमालेका महासचिव शङ्कर पोखरेलले बताउनुभयो ।
उहाँले सत्तारुढ गठबन्धनमै एमसीसी सम्झौतासम्बन्धमा कुरा बाझिएकाले पहिला सत्तारुढ गठबन्धन स्पष्ट हुनुपर्ने एमालले अडान राखेको बताउनुभयो । एमसीसीका बारेमा एमाले अध्यक्ष ओलीको भनाइ उद्धृत गर्दै महासचिव पोखरेलले भन्नुभयो, “‘सरकारले आफ्नो धारणा स्पष्ट बनाओस्, राष्ट्रिय मामिलाका कुनै पनि विषयमा प्रतिपक्ष अनिर्णित हुँदैन। सत्ता पक्ष पनि अनिर्णित भएर बस्नु हुँदैन भन्ने कुरा राखेका छौँ ।” छलफलमा एमालेले संसद् सुचारु गर्नेबारे सभामुखको कदम सच्चिनुपर्ने भनाइ राखेको उहाँले बताउनुभयो ।
उहाँका अनुसार एमालेले सभामुखले संसद्मा १४ जना गैरसांसदलाई राख्न नहुने बारेमा छलफलमा राखेको थियो । पोखरेलले स्थानीय निकायको निर्वाचन समयमै हुनुपर्ने अडान राखेको पनि बताउनुभयो । यसैबीच अमेरिकाले एमसीसी सम्झौता संसद्बाट अनुमोदन गर्न नेपाल सरकारलाई यही फागुन १६ गतेसम्मको समयसीमा दिएको छ । सो समयभित्र अनुमोदन नभए एमसीसी सम्झौता कार्यान्वयन गर्ने वा नगर्ने भन्ने निर्णय एमसीसी बोर्डले गर्ने उसले चेतावनी दिएको छ ।
