मुम्बईः भारतको महाराष्ट्र राज्यको नासिक स्थित जाकिर हुसेन अस्पतालमा अक्सिजन ट्याँक लिक भएर २२ जना बिरामीको मृत्यु भएको छ ।
कोरोनाभाइरस सङ्क्रमितको पनि उपचार हुने उक्त अस्पतालमा भएको यस घटनामा मृत्यु हुनेहरु अधिकांश भेन्टिलेटरमा उपचार गराइरहेका कोरोना सङ्क्रमित रहेको जिल्ला कलेक्टर सुरज मान्धारेले बताउनु भएको छ ।
भारतीय गृहमन्त्री अमित शाहले अक्सिजन लिक भएर अस्पतालमा उपचार गराइरहेका बिरामीको मृत्यु हुनु दुःखद रहेको बताउनु भएको छ ।
बिरामीलाई दिइरहेको अक्सिजन झण्डै आधा घन्टासम्म चुहिएपछि बिरामीमा अक्सिजन कमी भएको प्रारम्भिक अनुसन्धानबाट खुलेको छ ।
भारतमा कोरोनाभाइरसको सङ्क्रमण सबैभन्दा बढी महाराष्ट्र राज्यमा देखिएको छ । यहाँका अस्पतालहरु सङ्क्रमित बिरामीले खचाखच भरिएका छन् ।
भारतमा पछिल्लो २४ घण्टामा २ लाख ५९ हजार नयाँ सङ्क्रमित देखिएका छन् भने एकै दिन दुई हजारभन्दा बढीको मृत्यु भएको छ । (एएनआई)
