मुस्ताङः कोरोनाभाइरस संक्रमण बढेसँगै जिल्लाको प्रसिद्ध मुक्तिनाथ मन्दिरमा नित्य पूजाआजा बाहेक दर्शनार्थीलाई मन्दिर प्रवेशमा रोक लगाइएको छ ।
मुस्ताङका प्रमुख जिल्ला अधिकारी जगदीश अर्यालले जिल्ला कोभिड संकट व्यवस्थापन केन्द्रको निर्णय बमोजिम हालका लागि बैशाख मसान्तसम्म सर्वसाधारणका लागि मन्दिरभित्र प्रवेशमा रोक लगाइएको जानकारी दिनुभयो ।
उहाँले परिस्थितिकाे मूल्याँकन गरेर बैशाख मसान्तपछि मन्दिर खाेल्ने वा नखाेल्ने बारेमा निर्णय हुने बताउनुभयाे ।
केन्द्रको आज बुधबार बसेको बैठकले मुक्तिनाथ मन्दिर लगायतका मठ, मन्दिर, गुम्बा, चर्च समेतका धार्मिक स्थलमा हुने नित्य पूजा, ध्यान र प्रार्थना बाहेक अन्य धार्मिक गतिविधि बैशाख मसान्तसम्म बन्द गर्ने निर्णय गरेको थियो ।
मुक्तिनाथ मन्दिरमा पछिल्लो समय निकै भिडभाड बढेको छ । नेपाल सहित भारतबाट समेत दर्शनार्थीहरु तथा आन्तरिक पर्यटक मुक्तिनाथ मन्दिर पुग्ने गरेका छन् ।
