काठमाडौँ । उद्योग, वाणिज्य तथा आपूर्तिमन्त्री रमेश रिजालले उपभोक्तामाथि ठगी गर्ने खालको कुनैपनि काम आफूबाट हुनै नसक्ने बताउनुभएको छ ।
सोमवार संघीय संसद प्रतिनिधि सभा अन्तगतको सार्वजनिक लेखा समितिको बैठकमा बोल्दै उहाँले आफूले उपभोक्ताको नाममा बद्मासी गरेको प्रमाणित भए तत्काल पदबाट राजीनामा दिने समेत बताउनु भयो । मन्त्री रिजालले चाडपर्वका बेलामा पनि दैनिक उपभोग्य वस्तुको मूल्यवृद्धि नियन्त्रण गर्न नसकेको स्वीकार गर्दै आगामी दिनमा त्यसमा सुधार गर्दै लैजाने प्रतिवद्धता समेत व्यक्त गर्नुभयो । उहाँले कालो बजारी गर्नेहरुलाई सोही अनुसारको दण्डसजायको व्यवस्था गर्न कानूनकै अभाव रहेको गुनासो समेत गर्नुभयो । मन्त्री रिजालले उपभोक्ताहरुमाथि ठगी गर्नेहरुलाई गरिएको दण्डसजाय असुली गर्न सरकारसँग कुनै मेकानिजमनै नभएको पनि पटकपटक बताउनु भयो ।
मन्त्री रिजालले भन्नुभयो, ‘मैले कुनै दिन गल्ती गरे भने तुरुन्तै राजीनामा दिएर बाहिर जान्छु भन्ने म विश्वास तपाईहरुलाई दिलाउन चाहन्छु । मलाई न त्यो जरुरत छ । न म बाट कमिशन खाने काम हुन्छ भनेर म विश्वास दिलाउन चाहन्छु । कानूनी सजाय दिने अधिकार हामीसँग धेरै छैन् । कानूनहरुमा पनि परिमार्जन गर्नुपर्ने जरुरत हामीले देखेका छौं । अव त्यो विस्तारै हुँदै जाला । अव ठूल्ठूला बद्मासहरुले ठूल्ठूला अपराधहरु गरिरहेका हुन्छन् । तर ३ लाख भन्दा बढी सजाय गर्न सकिँदैन । सजाय गरिएको पैसा असुली गर्न पनि हामीलाई कानूनको अभाव छ । उसले आएर दियो भने त ठिकै हो । तर दिएन भने उठाउनका लागि कुनै मेकानिज्म पनि बनिसकेको छैन । ’
बैठकमा बोल्दै सत्तारुढ दलका सांसदहरुले नै चाडपर्वलाई ध्यानमा राखेर सरकारले आम उपभोक्तामा हित हुनेगरी आवश्यक व्यवस्था मिलाउन नसकेको गुनासो गर्नुभएको थियो । सत्तारुढ प्रमुख घटक नेपाली काँग्रेसका सांसद राजेन्द्रकुमार केसीले चिनी जस्ता चाडपर्वमा अतिआवश्यक बस्तुको समेत व्यवस्था गर्न नसकेको भन्दै सरकारको आलोचना गर्नुभयो । उहाँले साल्ट ट्रेडिङ र खाद्य संस्थानले आफ्नो काम गर्न नसकेको भन्दै त्यसलाई खारेज गर्नुपर्ने अवस्था आएको पनि बताउनु भयो ।
सांसद केसीले भन्नुभयो, ‘यदी बजारलाई हस्तक्षेप गर्ने हो भने चाडपर्व आउँछ भन्ने पनि थाहा छ । बढि चिनी तिहारमा चाहिन्छ भन्ने पनि थाहा छ । मन्त्रीज्यू आउनु भएको पनि ३/४ महिना भयो । के हुँदैछ यो नेपालमा ? सबै कुरा थाहा छ । तर हामीले निर्णय गरेका छैनौं । यो विषय गम्भिर विषय हो ।’
नेपाली काँग्रेसकै अर्का सांसद अर्जुननरसिंह केसीले चाडपर्वका बेला बजार अनुगमन गरेपनि सरकारले जनताको चाहना अनुसार सस्तो मूल्यका वस्तुहरुको उपलब्धता गराउन नसकेको बताउनु भयो । उहाँले मूल्यवृद्धि निरन्तरको प्रक्रिया जस्तो बन्दा पनि त्यसलाई नियन्त्रण गर्न सरकार लागि नपरेका गुनासो गर्नुभयो ।
सांसद केसीले भन्नुभयो, ‘ यो बजार अनुमगन समिति बन्छ हामीहरुको । त्यसले अनुगमन गर्छ । तर त्यसको परिणाम के हो भन्दा जुन जनताले चाहेको परिणाम हो । त्यो चाहीँ हुन सकेको छैन । पेट्रोलियम पदार्थको भाउ केही घटाइएको छ । तर त्यो तुरुन्तै बढछ । यो मूल्यवृद्धिको निरन्तरको प्रक्रियालाई नियन्त्रण गर्न नसक्दा मुलुकमा वित्तीय अराजकता नै आइसकेको छ । यसलाई सरकारले नियन्त्रण गर्नुपर्दैन ?’
सांसद केसीले मुलुकमा वित्तिय अराजकताको शुरुवात भइरहेकोतर्फ पनि सरकारलाई सचेत गराउनु भयो ।
